قازاقستان پرەزيدەنتى قاسىم-جومارت توقاەۆ 2026 – 2028 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى زاڭعا قول قويدى، دەپ حابارلايدى “ادىرنا”.
"مەملەكەت باسشىسى "رەسپۋبليكالىق جانە وبلىستىق بيۋدجەتتەر، رەسپۋبليكالىق ماڭىزى بار قالالار، استانا بيۋدجەتتەرى اراسىنداعى 2026 – 2028 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى" قازاقستان رەسپۋبليكاسىنىڭ زاڭىنا قول قويدى", دەلىنگەن اقوردا ءباسپاسوز قىزمەتىنىڭ حابارلاماسىندا.
سونداي-اق، اقوردانىڭ حابارلاۋىنشا، مەملەكەت باسشىسى "2026 – 2028 جىلدارعا ارنالعان رەسپۋبليكالىق بيۋدجەت تۋرالى" قازاقستان رەسپۋبليكاسىنىڭ زاڭىنا قول قويدى.
ايتا كەتسەك، 2025 جىلى 20 قاراشادا پارلامەنت سەناتىنىڭ وتىرىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين "2026-2028 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى" قر زاڭىنىڭ جوباسىن تانىستىرعان بولاتىن.
"جەرگىلىكتى بيۋدجەتتەر تەڭگەرىمدىلىگى قامتاماسىز ەتىلدى. بارلىق بازالىق شىعىستار ەسكەرىلدى. دامۋ بيۋدجەتى رەسپۋبليكالىق بيۋدجەتتىڭ مۇمكىندىگىن ەسكەرە وتىرىپ قالىپتاستىرىلدى", دەپ اتاپ ءوتتى ۆيتسە-پرەمەر.
جەرگىلىكتى بيۋدجەت كىرىستەرى 2026 جىلى 10,7 ترلن تەڭگە بولادى دەپ بولجانۋدا.
پارلامەنت سەناتىنىڭ وتىرىسىندا ۆيتسە-پرەمەر سەرىك جۇمانعارين جالپى سيپاتتاعى ترانسفەرتتەردىڭ پارامەترلەرىن قاراۋ بارىسىندا وڭىرلەردىڭ الداعى ءۇش جىلعا ارنالعان كىرىستەرىنىڭ بولجامدى كولەمىن ايتتى.
جەرگىلىكتى بيۋدجەت كىرىستەرى 2026 جىلى – 10,7 ترلن تەڭگە، 2027 جىلى – 12,1 ترلن تەڭگە، 2028 جىلى – 13,3 ترلن تەڭگە بولادى دەپ بولجانۋدا. شىعىستار 2026 جىلى 14,9 ترلن تەڭگەنى قۇراسا، 2028 جىلعا قاراي 18,7 ترلن تەڭگەگە دەيىن وسەدى.
ءۇش جىلعا ارنالعان وڭىرلەردى دامىتۋ بيۋدجەتى 9,1 ترلن تەڭگەنى قۇرايدى. پارلامەنت سەناتىنىڭ كەزەكتى وتىرىسىندا پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين وڭىرلەردىڭ ينفراقۇرىلىمدىق مۇمكىندىكتەرىن تەڭەستىرۋ ءۇشىن دامۋ بيۋدجەتىنىڭ جىل سايىن ارتۋى تۋرالى مالىمدەدى.
"دامۋ بيۋدجەتى جىل سايىن ارتىپ كەلەدى: 2026 جىلى – 1,8 ترلن تەڭگە، 2027 جىلى – 3,2 ترلن تەڭگە جانە 2028 جىلى – 4,1 ترلن تەڭگە. ءۇش جىلدا بارلىعى – 9,1 ترلن تەڭگە", دەپ اتاپ ءوتتى سەرىك جۇمانعارين.
سونىمەن قاتار جيىندا "بايتەرەك" اق-نى كاپيتالداندىرۋعا شامامەن 1 ترلن تەڭگە قاراستىرىلاتىنى ايتىلدى.
