«ءبىلىم تۋرالى» زاڭدا وقۋشىلار مەن ۇستازداردىڭ قاۋىپسىزدىگىن قامتاماسىز ەتۋ تۋرالى ءبىر اۋىز ءسوز جوق. بۇل تۋرالى سەنات دەپۋتاتى نۇرتورە ءجۇسىپ ءاليحان سمايىلوۆقا جولداعان ساۋالىندا ايتتى، دەپ حابارلايدى “ادىرنا” ۇلتتىق پورتالى.
دەپۋتات پەتروپاۆلداعى 9-سىنىپ وقۋشىسىنىڭ مەكتەپكە بالتا مەن پىشاق الىپ كەلىپ، 3 بالانى جاراقاتتاعانىن ەسكە سالىپ ءوتتى.
"بۇل توتەنشە جاعدايلاردى بولجاۋ جۇيەسىندەگى، ەرتە الدىن الۋداعى كۇردەلى پروبلەمالارعا نازار اۋداردى. ەلىمىزدە بۇل باعىت بويىنشا ماڭىزدى عىلىمي بازا جوق. وقۋشىلاردىڭ پسيحولوگيالىق پورترەتىن جاساۋ، وتباسىنىڭ الەۋمەتتىك مارتەبەسىن انىقتاۋ كەزىندە دەپرەسسياعا نەمەسە اگرەسسياعا بەيىم بالالاردى الدىن-الا وقشاۋلاۋ ەسكەرىلمەيدى", - دەدى نۇرتورە ءجۇسىپ سەناتتىڭ جالپى وتىرىسىندا.
ونىڭ پىكىرىنشە، كوپساتىلى كەشەندى قاۋىپسىزدىك جۇيەسىن جاساۋدى كۇن تارتىبىنە شىعارۋ كەرەك.
"الەمدە مۇنداي تاجىريبەلەر بار. قاي ەل بولسىن بۇل ماسەلەگە اسقان جاۋاپكەرشىلىكپەن قارايدى. ماسەلەن قىتايدا مەكتەپكە تەك وقۋشىنىڭ دا اتا-انانىڭ دا سۋرەتى بار ارنايى كۋالىكپەن كىرۋگە بولادى. كەز كەلگەن وقۋ ورنىندا كۇزەتشى كابينكاسى قويىلعان. كەلگەن ادامنىڭ كۋالىگى بولماسا، تەك مۇعالىم عانا ەرتىپ كىرە الادى.
فرانتسيادا وقۋشىلارعا عيماراتقا الىپ كىرۋگە بولمايتىن زاتتار ءتىزىمى جازىلعان نۇسقاۋلىق بەرىلەدى. ساباق اراسىندا ريۋكزاكتار مەن پورتفەلدەر تەكسەرىلەدى. جىلىنا 2 رەت انتيتەرروريستىك جاتتىعۋ ساباقتارى وتكىزىلەدى", - دەدى دەپۋتات.
نۇرتورە ءجۇسىپ «ءبىلىم تۋرالى» زاڭدا وقۋشىلار مەن ۇستازداردىڭ قاۋىپسىزدىگىن قامتاماسىز ەتۋ تۋرالى ءبىر اۋىز ءسوز جوعىن دا اتاپ ءوتتى.
سىزدەن (ۇكىمەت باسشىسى ءاليحان سمايىلوۆتان – اۆتور) ەلىمىزدەگى ءبىلىم بەرۋ مەكەمەلەرىندە كريمينالدىق جانە تەرروريستىك سيپاتتاعى قاۋىپ-قاتەردەن قورعايتىن، وقۋ ورىندارىنداعى وقۋشىلاردى، مۇعالىمدەر مەن قوسالقى پەرسونالدى ساقتاۋعا ارنالعان قاۋىپسىزدىكتى قامتاماسىز ەتۋدىڭ ءتيىمدى جۇيەسىن جاساۋ جونىندە شۇعىل كەشەندى شارالار قابىلداۋدى سۇرايمىز، – دەدى سەناتور.
ايتا كەتەيىك، بۇعان دەيىن وقۋ-اعارتۋ مينيسترلىگى پەتروپاۆلداعى جاعدايدان سوڭ ەلىمىزدەگى بارلىق مەكتەپتىڭ قاۋىپسىزدىگى تەكسەرىلەتىنىن حابارلاعان
