سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ اتىراۋ وبلىسىنىڭ تۇرعىندارىمەن كەزدەسۋدە كاسپي تەڭىزىنە باعىتتالعان سۋ كولەمى مەن وڭىردەگى سۋ ۇنەمدەۋ تەحنولوگيالارىنىڭ ناتيجەلەرى تۋرالى ايتتى، دەپ حابارلايدى "ادىرنا".
جايىق-كاسپي باسسەيندىك ينسپەكتسياسىنىڭ مالىمەتىنشە، سوڭعى 2,5 جىلدا كاسپي تەڭىزىنە 35 ملرد تەكشە مەتردەن استام سۋ جىبەرىلگەن.
ونىڭ ىشىندە شامامەن جارتىسى – 17 ملرد تەكشە مەتردەن استام سۋ 2024 جىلى تىركەلگەن اۋقىمدى سۋ تاسقىنى كەزەڭىنە تيەسىلى.
ال 2026 جىلدىڭ باسىنان بەرى كاسپي تەڭىزىنە 6,16 ملرد تەكشە مەتر سۋ باعىتتالدى.
سونداي-اق، مينيستر 2025 جىلدىڭ قورىتىندىسى بويىنشا اتىراۋ وبلىسىندا جاڭبىرلاتىپ جانە تامشىلاتىپ سۋارۋ جۇيەلەرى ارقىلى 9,3 مىڭ گەكتار جەر سۋارىلىپ، ناتيجەسىندە 12,8 ملن تەكشە مەتر سۋ ۇنەمدەلدى. ال بيىل سۋ ۇنەمدەۋ تەحنولوگيالارى قوسىمشا 800 گەكتار اۋماقتا ەنگىزىلدى.
ء"بىزدىڭ مىندەتىمىز – سۋ رەسۋرستارىن ۇتىمدى ءارى ۇنەمدى پايدالانۋدى قامتاماسىز ەتۋ، سونداي-اق سۋ شىعىنىنا جول بەرمەي، ونى ناقتى قاجەت جەرلەرگە، ياعني ەگىستىك القاپتارعا، كاسىپورىندارعا جانە ازاماتتاردىڭ ۇيلەرىنە ۋاقىتىلى جەتكىزۋ", – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.ۇقساس جاڭالىقتار
