بۇگىن جەزقازعان قالاسى تالاپ اۋىلىندا قالا كۇنىنە وراي كىرپىش وندىرەتىن زاۋىتتىڭ اشىلۋ سالتاناتى ءوتتى، دەپ حابارلايدى “ادىرنا” ۇلتتىق پورتالى.
زاۋىتتى ۇلىتاۋ وبلىسىنىڭ اكىمى بەرىك ابدىعاليۇلى ارنايى كەلىپ اشىپ، كاسىپكەرلەرگە ساتتىلىك تىلەدى.
زاۋىتتىڭ سالىنۋى 2022 جىلى باستالىپ، بۇگىنگى كۇنى تولىعىمەن ءونىم شىعارۋعا دايىن. زاۋىت 60 جۇمىس ورنىن قامتيدى جانە جوعارعى ساپالى كەراميكالىق كىرپىشتى وزىمىزدە شىعارۋعا زور مۇمكىندىك بەرەدى. زاۋىتتا جىلىنا 20 ملن. دانا كىرپىش وندىرىلەدى دەپ كۇتىلۋدە.
ءوندىرىس باعدارلاماسى قىزىلوردا وبلىسىنداعى كەراميكالىق كىرپىش ءوندىرۋ نارىعىندا جەكە كاسىپكەر بەكمۇراتوۆ تەليبايدىڭ جۇمىسىنىڭ 10 جىلدان استام تاجىربيەسى نەگىزىندە جاسالدى.
زاۋىت ديرەكتورى، جەكە كاسىپكەر ت. بەكمۇراتوۆ زاۋىتتىڭ اشىلۋىنا قولداۋ كورسەتكەن جەزقازعان قالاسىنىڭ اكىمى ق.شايجانوۆ پەن تالاپ اۋىلىنىڭ اكىمى ق. باپانوۆقا العىس ءبىلدىرىپ، ۇلىتاۋ وبلىسىنا كاسىپ اشۋعا بارلىق ءوڭىردىڭ كاسىپكەرلەرىن شاقىردى.
"الپىستان استام جاڭا ورىن اشىلىپ، ۇلىتاۋلىقتار تۇراقتى جۇمىسپەن قامتىلاتىن بولادى. ونىمەن قوسا، ۇلىتاۋ وبلىسىنىڭ قۇرىلىس-مونتاجداۋ وبەكتىلەرى، قۇرىلىس بازارلارى ءوز ءونىمىمىزدى قولدانادى. بۇل - بارلىعىمىز ءۇشىن دە يگى باستاما دەپ بىلەمىن", - دەدى ءوڭىر باسشىسى.
