مەملەكەت باسشىسىنىڭ JOLTAP الەۋمەتتىك جوباسىنىڭ تابىستى تاجىريبەسىن ەلىمىزدىڭ وڭىرلەرىنە تاراتۋ جونىندەگى تاپسىرماسىن ورىنداۋ اياسىندا ۇلىتاۋ وبلىسى اكىمىنىڭ ورىنباسارى نۇرتاس كارىپباەۆ پەن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قۇرمەت ساتتىباەۆ استانا قالاسىنا جۇمىس ساپارىمەن بارىپ، جوبانىڭ ىسكە اسىرىلۋ تاجىريبەسىمەن تانىستى.
استانا قالاسىنىڭ اكىمدىگى مەن «جاڭا مۇمكىندىك» قوعامدىق قورى بىرلەسىپ جۇزەگە اسىرىپ جاتقان جوبا ازاماتتاردى سۇرانىسقا يە ماماندىقتارعا تەگىن وقىتۋ، جۇمىسقا ورنالاسۋىنا جاردەمدەسۋ جانە كاسىپكەرلىكتى دامىتۋ ارقىلى حالىقتىڭ تابىسىن ارتتىرۋعا باعىتتالعان.
ساپار بارىسىندا دەلەگاتسيا قولدانىستاعى وقۋ باعدارلامالارىن، وقۋ پروتسەسىن ۇيىمداستىرۋ ءتارتىبىن، جۇمىس بەرۋشىلەرمەن ءوزارا ءىس-قيمىل تەتىكتەرىن، سونداي-اق تۇلەكتەردى وقۋ اياقتالعاننان كەيىن قولداۋ جۇيەسىن زەردەلەدى.
كەزدەسۋدە JOLTAP جوباسىن ۇلىتاۋ وبلىسىندا ەنگىزۋ ماسەلەلەرىنە ەرەكشە نازار اۋدارىلدى.
ەلوردادا تيىمدىلىگىن كورسەتكەن تاجىريبەنى ءوڭىردىڭ ەكونوميكالىق ەرەكشەلىكتەرى مەن جەرگىلىكتى ەڭبەك نارىعىنىڭ قاجەتتىلىكتەرىنە بەيىمدەۋ جوسپارلانىپ وتىر. باسىم باعىتتار قاتارىندا ونەركاسىپ كاسىپورىندارىنا، شاعىن جانە ورتا بيزنەسكە، قىزمەت كورسەتۋ سالاسىنا قاجەتتى مامانداردى دايارلاۋ، سونداي-اق تۇرعىنداردىڭ تسيفرلىق داعدىلارىن دامىتۋ بار.
كەلەسى كەزەڭدە ەڭبەك نارىعىندا سۇرانىسقا يە ماماندىقتاردى ايقىنداۋ، جۇمىس بەرۋشىلەرمەن ءوزارا بايلانىستى جولعا قويۋ جانە جوبانى وڭىردە ىسكە اسىرۋدىڭ ۇيىمداستىرۋشىلىق تەتىگىن ازىرلەۋ كوزدەلگەن.
باستى مىندەت – ازاماتتارعا جاڭا ماماندىق مەڭگەرۋگە مۇمكىندىك بەرىپ قانا قويماي، ولاردىڭ جۇمىسقا ورنالاسۋىنا، كاسىبي وسۋىنە جانە تابىسىن ارتتىرۋىنا ناقتى جاعداي جاساۋ.
مۇنداي باستامالاردى ەنگىزۋ حالىقتى جۇمىسپەن قامتۋ مۇمكىندىكتەرىن كەڭەيتۋگە جانە ۇلىتاۋ وبلىسىنىڭ ادامي كاپيتالىن دامىتۋعا ىقپال ەتەدى.
