18 ناۋرىز كۇنى استانادا كوشپەندىلەردىڭ اسىق سپورتى حالىقارالىق فەدەراتسياسى رەسمي تۇردە اشىلدى، دەپ حابارلايدى “ادىرنا” ۇلتتىق پورتالى قازاقپاراتقا سىلتەپ.
اتالعان ۇيىم 12 ناۋرىزدا ادىلەت مينيسترلىگىنەن تىركەۋدەن وتكەن بولاتىن.
قر اسىق اتۋ فەدەراتسياسىنىڭ ءباسپاسوز قىزمەتى ءمالىم ەتكەندەي، حالىقارالىق فەدەراتسيانىڭ پرەزيدەنتى بولىپ پارلامەنت ءماجىلىسىنىڭ دەپۋتاتى، «Respublica» پارتياسى فراكتسياسىنىڭ مۇشەسى ولجاس قۇسپەكوۆ سايلاندى.
جاڭادان قۇرىلعان فەدەراتسياعا قازاقستاننان باسقا، تۇركيا، رۋمىنيا، موڭعوليا، قىرعىزستان، ماجارستان، وزبەكستان، قىتاي، يسپانيا جانە ساحا رەسپۋبليكاسى (رەسەي) مۇشەلىككە ءوتىنىش بەردى. الداعى ۋاقىتتا ۇيىمعا مۇشە ەلدەر سانى ارتا تۇسەتىنى ءسوزسىز.
فەدەراتسيا الدىنا دۇنيەجۇزىلىك ەتنوسپورت قاۋىمداستىعىنا ەنۋ، 5-ءشى دۇنيەجۇزىلىك كوشپەندىلەر ويىندارىنا دايىندىق جۇمىستارىن جۇرگىزۋ جانە وسى ويىن اياسىندا تۇڭعىش رەت الەم چەمپيوناتىن وتكىزۋ سەكىلدى ماقساتتار قويىپ وتىر.
«Respublica» پارتياسىنىڭ كەڭسەسىندە وتكەن العاشقى جيىندا ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ دامىتۋ بويىنشا، اسىق اتۋدان ۇلتتىق قۇرامانىڭ باس باپكەرى جومارت سابىرجانۇلى سپورت بويىنشا جانە تۇركيا مەملەكەتىندە اسىق سپورتىن دامىتۋعا اتسالىسىپ جۇرگەن تۇرىك ازاماتى راۋف وزگەن حالىقارالىق بايلانىستار بويىنشا ۆيتسە-پرەزيدەنتتەر بولىپ سايلاندى. اسىق اتۋدان مەملەكەتتىك جاتتىقتىرۋشى جومارت ورازوۆ باس حاتشى بولدى.
