ۇلىتاۋ وبلىسىنىڭ اكىمدىگى مەن «وتباسى بانك» جىل سايىن تۇرعىن ءۇي باعدارلامالارىن قارجىلاندىرۋعا 3 ملرد تەڭگەدەن باعىتتايدى.
بۇگىن رەسپۋبليكا كۇنى قارساڭىندا وبلىس اكىمى ەسەت بايكەن مەن «وتباسى بانك» باسقارما ءتورايىمى ءلاززات يبراگيموۆا 2027–2029 جىلدارعا ارنالعان ىنتىماقتاستىق تۋرالى مەموراندۋمعا قول قويدى.
جاڭا «ۇلىتاۋ باسپانا» وڭىرلىك باعدارلاماسى اياسىندا باستاپقى جارناسى 10%-دان باستالاتىن، جىلدىق سىياقى مولشەرلەمەسى 5% بولاتىن تۇرعىن ءۇي زاەمدارىن بەرۋ جوسپارلانىپ وتىر. قارجىنىڭ 2,5 ملرد تەڭگەسىن جىل سايىن «وتباسى بانك»، ال 500 ملن تەڭگەسىن وبلىس اكىمدىگى بولەدى.
وبلىس اكىمى ەسەت بايكەننىڭ ايتۋىنشا، باعدارلاما تۇرعىن ءۇي قورىن جاڭارتۋعا، باسپانا كەزەگىن قىسقارتۋعا جانە ءوڭىر تۇرعىندارىنىڭ جەكە باسپانا الۋ مۇمكىندىگىن كەڭەيتۋگە باعىتتالعان.
«وتباسى بانكپەن بىرلەسكەن جۇمىستى جاڭا دەڭگەيگە كوتەرىپ، ءوڭىر تۇرعىندارى ءۇشىن قوسىمشا مۇمكىندىكتەر اشۋدى كوزدەپ وتىرمىز. «ۇلىتاۋ باسپانا» باعدارلاماسىنىڭ ەرەكشەلىگى – ونى جۇزەگە اسىرۋعا ءىرى جانە ورتا بيزنەس وكىلدەرى دە قاتىسىپ، ءوز قىزمەتكەرلەرىنىڭ تۇرعىن ءۇي جاعدايىن جاقسارتۋعا ۇلەس قوسا الادى. قازىردىڭ وزىندە العاشقى الەۋەتتى سەرىكتەستەر جوبانى قولداۋعا دايىن ەكەنىن ءبىلدىردى.
ءبىز ءۇشىن جۇمىسشى ماماندىقتارىنىڭ وكىلدەرىنە، الەۋمەتتىك سالا قىزمەتكەرلەرىنە جانە ءوندىرىس ورىندارىنىڭ ماماندارىنا باسپانا الۋعا مۇمكىندىك جاساۋ ماڭىزدى. ادامداردىڭ تۋعان جەرىندە قالىپ، ەڭبەك ەتىپ، وتباسىن قۇرىپ، بولاشاعىن ۇلىتاۋ وڭىرىمەن بايلانىستىرۋى ءۇشىن قاجەتتى جاعداي جاساۋىمىز كەرەك»، – دەدى ەسەت بايكەن.
وڭىردە بىرلەسكەن تۇرعىن ءۇي باعدارلامالارىن جۇزەگە اسىرۋ تاجىريبەسى بار. ءۇش جىل ىشىندە «ۇلىتاۋ جاستارى» باعدارلاماسى بويىنشا 137 جاس باسپانالى بولدى. ال 2025 جىلى ىسكە قوسىلعان «ساتباەۆ جۇمىسكەر» جوباسى اياسىندا ساتباەۆ قالاسىنىڭ 15 تۇرعىنى پاتەر الدى. اتالعان باعدارلامالارعا بولىنگەن قارجىنىڭ جالپى كولەمى 2,6 ملرد تەڭگەنى قۇرادى.
بۇدان بولەك، «وتباسى بانكتىڭ» قولداۋىمەن تۇرعىن ۇيگە مۇقتاج ازاماتتار ەسەبىندە تۇرعان 429 ادام باسپانامەن قامتىلدى.
بۇگىن رەسپۋبليكا كۇنى قارساڭىندا جەزقازعان جانە ساتباەۆ قالالارىنىڭ تۇرعىندارى دا جاڭا پاتەرلەردىڭ كىلتىن الدى. وبلىس اكىمى ەسەت بايكەن مەن «وتباسى بانك» باسقارما ءتورايىمى ءلاززات يبراگيموۆا جاڭا قونىس يەلەرىن قۋانىشىمەن قۇتتىقتاپ، شاڭىراقتارىنا باق-بەرەكە، قۇت-ىرىس پەن وتباسىلىق باقىت تىلەدى.
«ۇلىتاۋ باسپانا» باعدارلاماسىنىڭ ىسكە قوسىلۋى تۇرعىن ۇيگە قولداۋ كورسەتۋ تەتىكتەرىن كەڭەيتىپ، وڭىردەگى جۇمىسشىلاردى باسپانامەن قامتۋعا بيزنەستى تارتۋعا مۇمكىندىك بەرەدى.
