بۇگىن مەملەكەت باسشىسى قاسىم-جومارت توقاەۆ قازاقستان حالقىنا «قازاقستاننىڭ جاڭا تاريحي كەزەڭىندەگى وزەكتى مىندەتتەر» اتتى جولداۋىن جاريالادى.
جولداۋدىڭ نەگىزگى تاقىرىبى — ەلدى دامىتۋ جانە ازاماتتاردىڭ ءومىر ءسۇرۋ ساپاسىن ارتتىرۋ. پرەزيدەنت ينفراقۇرىلىمدى جاڭعىرتۋدىڭ، الەۋمەتتىك نىساندار سالۋدىڭ، تۇرعىن ءۇي-كوممۋنالدىق شارۋاشىلىقتى جاقسارتۋدىڭ جانە جايلى قالالىق ورتا قالىپتاستىرۋدىڭ ماڭىزىن اتاپ ءوتتى. سونداي-اق وڭىرلەردى دامىتۋ مەن وتاندىق بيزنەستى قولداۋعا ەرەكشە نازار اۋدارىلدى.
ۇلىتاۋ وبلىسى ءۇشىن بۇل مىندەتتەردىڭ ماڭىزى ەرەكشە. الداعى ۋاقىتتا ينفراقۇرىلىمدى دامىتۋ، الەۋمەتتىك قىزمەتتەردىڭ قولجەتىمدىلىگى مەن ساپاسىن ارتتىرۋ، تۇرعىندار مەن بيزنەس ءۇشىن قولايلى جاعداي جاساۋ باعىتىندا جۇيەلى جۇمىس جۇرگىزۋ قاجەت.
وسى باعىتتا مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىنا سايكەس جانە ۇكىمەتتىڭ قولداۋىمەن وبلىستا 30-عا جۋىق الەۋمەتتىك جانە ينفراقۇرىلىمدىق نىساندى جاڭعىرتۋ باستالدى. بۇل ءوڭىردىڭ ينجەنەرلىك جۇيەلەرىن جاقسارتۋعا، ەلدىمەكەندەردىڭ ينفراقۇرىلىمدىق الەۋەتىن ارتتىرۋعا جانە ودان ءارى دامۋعا بەرىك نەگىز قالىپتاستىرۋعا مۇمكىندىك بەرەدى.
ءوڭىردىڭ دامۋىندا كولىك ينفراقۇرىلىمى ماڭىزدى ءرول اتقارادى. مەملەكەت باسشىسىنىڭ تاپسىرماسى بويىنشا «سامۇرىق-قازىنا» اكتسيونەرلىك قوعامى وبلىستاعى ءتورت تەمىرجول ۆوكزالىن، ياعني جەزقازعان مەن قاراجال قالالارىنداعى، جاڭاارقا اۋدانىنداعى جانە قىزىلجار ستانتسياسىنداعى ۆوكزالداردى جاڭعىرتىپ، جولاۋشىلار ءۇشىن قايتا پايدالانۋعا بەردى.
جەزقازعان — قىزىلوردا جانە جەزقازعان — ارقالىق اۆتوموبيل جولدارىنىڭ قۇرىلىسىن اياقتاپ، پايدالانۋعا بەرۋ ءوڭىرىمىز ءۇشىن ۇلكەن ماڭىزعا يە. بۇل باعىتتار كولىك قاتىناسىن جاقسارتىپ، جۇك جانە جولاۋشىلار تاسىمالىنا قولايلى جاعداي جاسايدى، ساۋدا-ەكونوميكالىق بايلانىستاردى كەڭەيتەدى. جەزقازعان — قاراعاندى اۆتوجولىنىڭ قۇرىلىسى دا قارقىندى جۇرگىزىلىپ جاتىر. بۇل جوبالاردىڭ ساپالى جۇزەگە اسىرىلۋى وبلىستىڭ كولىك-لوگيستيكالىق الەۋەتىن نىعايتىپ، ينۆەستيتسيالىق تارتىمدىلىعىن ارتتىرۋعا ىقپال ەتەدى.
مەديتسينالىق ينفراقۇرىلىمدى دامىتۋعا دا ەرەكشە كوڭىل ءبولىنىپ وتىر. ۇلىتاۋ اۋىلىندا اۋىسىمىنا 100 ادام قابىلدايتىن ەمحاناسى بار 20 توسەك-ورىندىق اۋىلدىق اۋرۋحانانىڭ قۇرىلىسى قارقىندى جۇرگىزىلىپ جاتىر. نىساندى جىل سوڭىنا دەيىن پايدالانۋعا بەرۋ جوسپارلانعان.
«Zhyly Zhurek» قورى وسى جىلدىڭ شىلدە ايىنان باستاپ اۋىسىمىنا 250 ادام قابىلدايتىن ەمحانانىڭ قۇرىلىسىن قولعا الدى.
جەزقازعان قالاسىنداعى وبلىستىق كوپبەيىندى اۋرۋحانانى جاڭعىرتۋ اياسىندا ونكولوگيالىق ورتالىق پەن پەريناتالدىق ورتالىق سالىنادى. جاقىن ۋاقىتتا قۇرىلىس-مونتاج جۇمىستارى باستالادى.
«سامۇرىق-قازىنا» اق-مەن قول جەتكىزىلگەن كەلىسىمدەر اياسىندا جەزقازعان قالاسىندا بالالارعا ارنالعان ينكليۋزيۆتى وڭالتۋ ورتالىعى مەن زاماناۋي ينكليۋزيۆتى سپورت كەشەنى سالىنادى.
وبلىستا سپورت، مادەنيەت جانە الەۋمەتتىك ينفراقۇرىلىمنىڭ جاڭا نىساندارىن سالۋ دا جوسپارلانعان. «Qarmet» اق قاراجال قالاسىندا بالاباقشا سالۋدى جوسپارلاپ وتىر. سونىمەن قاتار «قازاقمىس» كورپوراتسياسى الداعى جىلدىڭ ءبىرىنشى جارتىجىلدىعىندا جەزقازعان قالاسىندا 800 ورىندىق كونگرەسس-ورتالىقتىڭ، تەننيس ورتالىعىنىڭ جانە جاڭا ستاديوننىڭ قۇرىلىسىن باستاۋدى جوسپارلاپ وتىر.
مەملەكەت باسشىسى ايقىنداعان باسىمدىقتار وبلىستاعى الداعى جۇمىستىڭ نەگىزگى باعىتىن بەلگىلەيدى. بۇل جوبالاردى ىسكە اسىرۋ تۇرعىندار ءۇشىن جاڭا مۇمكىندىكتەر اشىپ، ءوڭىردىڭ الەۋەتىن نىعايتادى.
