ۇلىتاۋ وبلىسىنىڭ اكىمى داستان رىسپەكوۆ جەزقازعان قالاسىنا جۇمىس ساپارى بارىسىندا گوگول، عارىشكەرلەر جانە ەسەنبەرلين كوشەلەرىندەگى اۋلالاردى ارالاپ، ويىن الاڭدارىنداعى قۇرىلىس جانە جاڭعىرتۋ جۇمىستارىنىڭ بارىسىمەن تانىستى.
ءوڭىر باسشىسى ويىن الاڭدارى پايدالانۋعا بەرىلگەننەن كەيىن ولاردىڭ قاۋىپسىزدىگىن قامتاماسىز ەتۋ جانە ۇقىپتى كۇتىم جاساۋ بويىنشا باقىلاۋدى كۇشەيتۋدى تاپسىردى. سونداي-اق تۇرعىندارمەن، اسىرەسە بالالار مەن اتا-انالارمەن مۇلىكتى ۇقىپتى پايدالانۋ جونىندە ءتۇسىندىرۋ جۇمىستارىن ۇيىمداستىرۋدىڭ ماڭىزدىلىعىن اتاپ ءوتتى.
قۇرىلىس جۇمىستارى بىلتىر باستالىپ، ءالى اياقتالماعان جانە جاڭادان سالىنىپ جاتقان الاڭداردىڭ ساپاسى مەن بەلگىلەنگەن مەرزىمدە اياقتالۋىن ۇنەمى باقىلاۋدا ۇستاۋ قاجەتتىگىن ەسكەرتتى.
وبلىس اكىمى اۋلالاردا تۇرعىنداردىڭ جاۋاپكەرشىلىگىن ارتتىرىپ، يەلىك سەزىمىن قالىپتاستىرۋ ماقساتىندا اقپاراتتىق-ءتۇسىندىرۋ جۇمىستارىن جۇيەلى تۇردە جۇرگىزۋدى تاپسىردى.
ساپار بارىسىندا داستان جانداۋلەتۇلى قالا تۇرعىندارىمەن كەزدەسىپ، ولاردىڭ ۇسىنىس-پىكىرلەرىنە قۇلاق استى. سونىمەن قاتار، ويىن الاڭدارى پايدالانۋعا بەرىلگەن سوڭ، قۇرىلىس الاڭدارىندا قالعان قالدىق ماتەريالدار مەن قوقىستاردى ۋاقىتىلى جويۋدى قاتاڭ باقىلاۋعا الۋدى تاپسىردى. بۇرىننان قالعان ەسكى كەسپە تاستاردى تازالاۋ قاجەتتىگىن دە ەرەكشە اتاپ ءوتتى.
ءوڭىر باسشىسى «تازا قازاقستان» رەسپۋبليكالىق ەكولوگيالىق اكتسياسى اياسىندا اۋلالاردىڭ تازالىعىن ساقتاۋ – بارشا تۇرعىنداردىڭ ورتاق مىندەتى ەكەنىن جەتكىزىپ، بەلسەندى اتسالىسۋعا شاقىردى.
