ورمان ءورت ءسوندىرۋ ستانسالارىنىڭ قىزمەتكەرلەرىن ورتكە قارسى كيىممەن قامتاماسىز ەتۋ ءۇشىن ۇكىمەت رەزەرۆىنەن 918 ميلليون تەڭگە بولىنەدى. بۇل جونىندە تءيىستى قاۋلىعا پرەمەر-مينيستر ءاليحان سمايىلوۆ قول قويدى، دەپ حابارلايدى “ادىرنا” ۇلتتىق پورتالى.
قۇجاتقا سايكەس، ۇكىمەت رەزەرۆىنەن تابيعاتتى قورعاۋ جانە ورمان مەكەمەلەرىنىڭ ورمان ءورت ءسوندىرۋ ستانسالارىنىڭ قىزمەتكەرلەرىنە ورتكە قارسى كيىم ساتىپ الۋعا 918 ملن تەڭگە قاراجات بولىنەدى.
ۇكىمەتتىڭ ءباسپاسوز قىزمەتى حابارلاعانداي، بۇل 30 تابيعاتتى قورعاۋ جانە 16 ورمان مەكەمەسىنىڭ قىزمەتكەرلەرىن مەحانيكالىق جاراقاتتانۋدان، گيپوتەرميانىڭ، اگرەسسيۆتى سۇيىق قۇرامداردىڭ، جوعارى تەمپەراتۋرانىڭ اسەرىنەن قورعاۋعا، جۇمىسشىلاردى سوققىدان ساقتاۋعا، سونداي-اق باسقا مەحانيكالىق اسەرلەردەن قوسىمشا قورعاۋ ءۇشىن ورتكە قارسى كيىممەن جابدىقتاۋعا مۇمكىندىك بەرەدى.
