ۇكىمەت «ماسس-مەديا تۋرالى» زاڭ جوباسى ارقىلى جۋرناليستكە «ارتىقشىلىق» بەرەتىن پرەسس-كارتا ەنگىزۋگە قۇلشىنىپ وتىر. الايدا جۋرناليستەردىڭ اراسىندا ءباسپاسوز كارتاسىنا قارسى ازاماتتار كوپ. ءتورتىنشى بيلىك وكىلدەرىنە پرەسس-كارتا كەرەك پە، جوق الدە ءسوز بوستاندىعى كەرەك پە?
بۇل سۇراق مادەنيەت جانە اقپارات ءمينيسترى ايدا بالاەۆاعا قويىلدى. ناقتىراق ايتساق «جۋرناليستكە پرەسس-كارتادان قاراعاندا ءسوز بوستاندىعى بەرىلۋ كەرەك سەكىلدى. ەگەر ءسوز ەركىندىگى بەرىلسە بىزگە پرەسس-كارتا سەكىلدى ارتىقشىلىقتار كەرەك ەمەس. جۋرناليستەر قالاماي وتىرعان تالاپتى قابىلداۋعا سىزدەر نەگە كۇش سالىپ وتىرسىزدار؟» دەگەن سۇراققا مينيستر جاۋاپ بەردى.
- ەشكىم كۇش سالىپ وتىرعان جوق. مەن جاڭا ءبىز قوعامنىڭ تۇراقتى دامۋىنا مۇددەلىمىز دەپ ايتتىم عوي. سوندىقتان جۋرناليستەر تاراپىنان قابىلداماي، ونى «دۇرىس ەمەس» دەپ جاتساڭىزدار، ءبىز سىزدەردىڭ پىكىرلەرىڭىزدى سىيلايمىز، ونى ەسكەرەمىز. بۇل جەردە ءۇزىلدى-كەسىلدى وسى ماسەلە شەشىلدى دەگەن ءسوز جوق. قازىر ءبىز دەپۋتاتتارمەن تالقىلاپ جاتىرمىز. ءبىز وسى ءداستۇرلى اككرەديتاتسيانى قالدىرۋىمىزعا بولادى، بۇل بىزگە ەشقانداي زيان كەلتىرمەيدى. زاڭ جوباسىن ءبىز ءالى تالقىلايمىز. وعان قادالىپ، بەلدەن باسىپ جاسايمىز دەپ جاتقان ەشكىم جوق بۇل جەردە, – دەدى ول.
ءجۋرناليستىڭ «پارلامەنتتەگى كوپشىلىك دەپۋتاتتار زاڭدى قابىلداپ جىبەرۋى مۇمكىن عوي...» دەگەن سۇراعىنا مينيستر كۇلىپ جىبەردى.
- ونى تالقىلايمىز. ول جەردە قولدايتىن دا، قولدامايتىن دا ازاماتتار بار. سوندىقتان دا سىزدەردىڭ دە، وسى سالادا ىستەپ جۇرگەن مامانداردىڭ دا، دەپۋتاتتار مەن قوعامنىڭ دا پىكىرى ەسكەرىلەتىن بولادى, – دەدى مينيستر.
سەرىك جولداسباي
«ادىرنا» ۇلتتىق پورتالى
