فوتو: lada.kz
ماڭعىستاۋ وبلىسىندا وتكەن جىلى ءۇش بىردەي پەرزەنتىنەن ايىرىلعان 51 جاستاعى كۇمىساي پالەكەەۆا قايتادان انا اتاندى. ول 17 قاراشادا قىز بالانى دۇنيەگە اكەلدى. بۇل تۋرالى Lada.kz باسىلىمى جازدى، دەپ حابارلايدى "ادىرنا".
قايعىلى وقيعا بىلتىر مۇنايلى اۋدانىنا قاراستى قالامقاس تۇرعىن الابىندا بولعان. كۇمىساي پالەكەەۆانىڭ ءۇش بالاسى ۋلى گازدان ۋلانىپ، كوز جۇمعان. مارقۇمداردىڭ ۇلكەنى 1995 جىلى، ۇلى 2009 جىلى، ال كەنجە قىزى 2012 جىلى دۇنيەگە كەلگەن.
قارالى جاعدايدان كەيىن ەرلى-زايىپتىعا ەكستراكورپورالدى ۇرىقتاندىرۋ (ەكۇ) راسىمىنەن تەگىن وتۋگە مۇمكىندىك بەرەتىن سەرتيفيكات تابىستالعان. وسىلايشا، ولار تاعى ءبىر ءسابي ءسۇيىپ، وتباسىن تولىقتىرۋعا شەشىم قابىلداعان.
كۇمىساي 51 جاسىندا قايتادان انا اتاناتىنىنا باستاپقىدا سەنبەگەنىن ايتادى. ونىڭ سوزىنشە، بالالارىنان ايىرىلعاننان كەيىن ءۇي ءىشى بوساپ، ومىرلەرىندە ۇلكەن ورنى تولماس قايعى قالعان.
«بالالارىمنان ايىرىلعان سوڭ، ءۇيىمىز قاڭىراپ بوس قالدى. سول كەزدە ەكۇ ارقىلى بولسا دا بالا كوتەرىپ، دۇنيەگە اكەلسەم دەپ شەشتىم. قاسىمىزدا سۇيەنىش بولاتىن، قامقورلىق تانىتاتىن جان بولسا، ءومىر سۇرۋگە، العا ۇمتىلۋعا كۇش تابارمىز دەپ ويلادىم»، – دەدى ول.
كوپتەن كۇتكەن ءسابي كەسار تىلىگى ارقىلى دۇنيەگە كەلگەن. نارەستەنىڭ سالماعى 3400 گرامم، بويى 52 سانتيمەتر. دارىگەرلەردىڭ مالىمەتىنشە، جۇكتىلىك كەزىندە ەشقانداي اسقىنۋ بولماعان. قازىر انا مەن بالانىڭ جاعدايى جاقسى.
نارەستەگە اريا ەسىمى بەرىلگەن. بۇل ەسىمدى ءسابيدىڭ اكەسى تاڭداعان. كۇمىساي قىزىنىڭ العاشقى داۋىسىن ەستىگەن ساتتەگى سەزىمىن ەرەكشە تولقىنىسپەن ەسكە الادى. قازىر اناسى بار ۋاقىتىن ءسابيىنىڭ كۇتىمىنە ارناپ، وسى قۋانىشقا سەبەپكەر بولعان جاندارعا العىسىن ءبىلدىرىپ وتىر.
ايتا كەتەيىك، وتباسى بيىل تاعى ءبىر ماڭىزدى شەشىم قابىلداعان. قىركۇيەك ايىندا ەرلى-زايىپتى 13 جاستاعى ۇل بالانى اسىراپ العان. وسىلايشا، وتباسى جاڭا مۇشەلەرمەن تولىعىپ، ءومىرىن قايتا جالعاستىرۋعا مۇمكىندىك العان.
