2008 جىلعى 29 مامىردا اياق استىنان اقورداعا شاقىرىلدىم. پرەزيدەنت قازاقتىلدى بەس باسىلىمعا ينتەرۆيۋ بەرمەكشى ەكەن. "ايقىننان" نۇرتورە ءجۇسىپ، "تۇركىستاننان" شامشى پاتتەەۆ، "قازاق ادەبيەتىنەن" جۇماباي شاشتايۇلى، " ەگەمەننەن" ساۋىتبەك ابدراحمانوۆ (سۇقباتتىڭ مودەراتورى) جانە " انا تىلىنەن" مەن ەلدىڭ ەكونوميكاسىنىڭ، ونوماستيكانىڭ، "قازاقستاندىق ۇلت" ماسەلەسىن، تىل تاعدىرىن قوزعادىق.
ايتقانداي، ناۋرىزعا بەس كۇن دەمالىس سۇراعانىم ەسىمدە (كەيىن ءۇش كۇنگە ءتۇسىردى). ءازىر ستسەناري، ارينە. دەسە دە، "ۇشتۇعىرلى ءتىل" ماسەلەسىنە كەلگەندە بۇدان قازاق ءتىلى توقىراڭقىراپ قالماي ما، دەپ ابايلاڭقىراي جازىلعان سۇراقتى، تاتار ايتپاقشى، ۋسيليت قىلىپ، ء"ۇش ءتىلدى ءبىر ارباعا جەككەن كەزدە قازاق ءتىلى انا كۇشتى ەكى تىلگە شىداستىق بەرە الماي، وماقاتا قۇلاپ جۇرمەي مە؟!" دەدىم.
موۆەتون، ارينە، مەنىكى. بىراق سو كەزدە ەلدىڭ اۋزىندا جۇرگەن ءسوز ەدى. الايدا سۇقبات بەرۋشى جاۋابىندا كەنەت وزگەرىپ، ماعان قاراپ زىلدەنىڭكىرەپ، زارلەنىپ سويلەدى. ولاي بولمايتىنىن دالەلدەي. كىسىنى ۋىسىنا الىپ تۇراتىن، الاپاسى اسىڭقى ادام ەكەن. سۇراعىمدى كەيىن مونتاج جاساعاندا قيىپ بەردى، بىراق ينتەرۆيۋەردى قايدان قيسىن، ءزارلى جاۋابى سو كۇيىندە تۇر، وسى قالپىن ءجۇرسىن ەرمان بايقاپ قاپتى، كەيىن مەنەن سۇرادى، "نە بولدى، نە سۇرادىڭ؟" دەپ.
ايتپاقشى، ىشىمىزدە بىرەۋىمىز پرەزيدەنتتىڭ كوپ كىتابىنىڭ بىرەۋىن الا كەلگەن ەكەن، وسى كۇندەرى ۇلىنىڭ تۋعان كۇنى ەكەنىن ايتىپ، سىيلىققا قولتاڭباسىن جازدىرىپ الدى. "اپ-ماي، ناعىپ ويىما كەلمەگەن؟!" دەپ، ازداپ وپىنىپ قالدىم. پەندەمىز عو...
سوڭىندا پرەزيدەنت شتاندارتى قويىلعان ۇستەلدىڭ جانىندا سۇگىرەتكە تۇستىك. كەشىگىپ جۇرەتىن ادەتىم، ەڭ شەتكە تۇرىپ قاپپىن. بىراق قايتكەندە دە تۇرمىن. پرەزيدەنت ورتالىعىندا ءىلۋلى تۇرمىن. تاريحتىڭ قارا تاقتاسىندا.
سونىڭ الدىندا ءبىر جاعداي بولعان. راقىمجان وتارباەۆ پرەزيدەنتتىڭ بالالىق شاعى جايىندا "نۇرجاۋعان عۇمىر" دەيتىن پەسا جازىپ، ساحنالاتتى. سوعان "ورگە تارتتى اق كەمە" دەگەن كولدەي رەتسەنزيا-ەسسە جازىپ، سپەكتاكلدى ءىشىن كەپتىرىپ ماقتادىم. مارقۇم راقاڭنىڭ كوڭىلى ءۇشىن بولۋى كەرەك، دەسە دە وبەكتيۆتى تۇردە سپەكتاكلدىڭ باس كەيىپكەرىن جاقتاۋ، ماقتاۋ بولىپ شىقتى. ورگە تارتىپ بارا جاتقان اق كەمە...
بۇگىندە تاريحتىڭ ەنشىسىنە ءوتىپ بارا جاتقان بەيۋاق كەزەڭدى ماقتاۋ ناۋقانىنا قاتىسۋىم وسى ەكى-اق جاعداي بولۋى كەرەك. بىراق سونىڭ وزىمەن-اق مەن ومىرلىك ۇستانىمىما ادام ايتقىسىز وپاسىزدىق جاساعان ەكەنمىن. سەبەبىن ايتايىن.
اۆتورلىعى برۋنو ياسەنسكيگە تەلىنەتىن ءبىر ءسوز بار: «دۇشپانىڭنان قورىقپا — كوپ بولسا اتىپ كەتەر. ساتقىنداردان قورىقپا — كوپ بولسا ساتىپ كەتەر. نەمقۇرايدىلاردان قورىق — ولار اتپايدى دا، ساتپايدى دا، بىراق جەر بەتىندەگى بۇتكىل زۇلىمدىق سولاردىڭ ءۇنسىز كەلىسىمىمەن جاسالادى».
كۇشتىلەر مەن تىستىلەرگە جالباقتادىم دەپ ايتا المايمىن، بىراق سولارعا نەمقۇرايدىلىقپەن قاراعانىم، ءسويتىپ دارمەنسىزدىك تانىتقانىم انىق.
بۇگىن — 29 مامىر. مەنىڭ ارىلۋ كۇنىم.
قازاقتى وركەنيەتتىك تىعىرىققا اكەپ تىرەپ تاستاپ كەتكەن 30 جىلدىق" اق كەمەنىڭ " تاريحى جازىلۋى ءتيىس وسى كۇندەرى ارقايسىمىزدىڭ ءوز ارىلۋ كۇنىمىز بولۋى ءتيىس. ايتىپ ارىلاتىن كۇن.
وزگەدەن بۇرىن ءوزىڭنىڭ الدىندا قادىرىڭدى كەتىرمەس ءۇشىن. قالعان ومىرىڭدە كۇننىڭ جارىعىنا تۋرا قاراپ ءوتۋىڭ ءۇشىن.
ماقسات ءتاج-مۇرات
