2008 jylǵy 29 mamyrda aıaq astynan Aqordaǵa shaqyryldym. Prezıdent qazaqtildi bes basylymǵa ıntervıý bermekshi eken. "Aıqynnan" Nurtóre Júsip, "Túrkistannan" Shámshi Patteev, "Qazaq ádebıetinen" Jumabaı Shashtaıuly, " Egemennen" Saýytbek Abdrahmanov (suqbattyń moderatory) jáne " Ana tilinen" men eldiń ekonomıkasynyń, onomastıkanyń, "qazaqstandyq ult" máselesin, til taǵdyryn qozǵadyq.
Aıtqandaı, Naýryzǵa bes kún demalys suraǵanym esimde (keıin úsh kúnge túsirdi). Ázir senarıı, árıne. Dese de, "Úshtuǵyrly til" máselesine kelgende budan qazaq tili toqyrańqyrap qalmaı ma, dep abaılańqyraı jazylǵan suraqty, tatar aıtpaqshy, ýsılıt qylyp, "Úsh tildi bir arbaǵa jekken kezde qazaq tili ana kúshti eki tilge shydastyq bere almaı, omaqata qulap júrmeı me?!" dedim.
Moveton, árıne, meniki. Biraq so kezde eldiń aýzynda júrgen sóz edi. Alaıda suqbat berýshi jaýabynda kenet ózgerip, maǵan qarap zildenińkirep, zárlenip sóıledi. Olaı bolmaıtynyn dáleldeı. Kisini ýysyna alyp turatyn, alapasy asyńqy adam eken. Suraǵymdy keıin montaj jasaǵanda qıyp berdi, biraq ıntervıýerdi qaıdan qısyn, zárli jaýaby so kúıinde tur, osy qalpyn Júrsin Erman baıqap qapty, keıin menen surady, "Ne boldy, ne suradyń?" dep.
Aıtpaqshy, ishimizde bireýimiz prezıdenttiń kóp kitabynyń bireýin ala kelgen eken, osy kúnderi ulynyń týǵan kúni ekenin aıtyp, syılyqqa qoltańbasyn jazdyryp aldy. "Ap-maı, naǵyp oıyma kelmegen?!" dep, azdap opynyp qaldym. Pendemiz ǵo...
Sońynda prezıdent shtandarty qoıylǵan ústeldiń janynda súgiretke tústik. Keshigip júretin ádetim, eń shetke turyp qappyn. Biraq qaıtkende de turmyn. Prezıdent ortalyǵynda ilýli turmyn. Tarıhtyń qara taqtasynda.
Sonyń aldynda bir jaǵdaı bolǵan. Raqymjan Otarbaev prezıdenttiń balalyq shaǵy jaıynda "Nurjaýǵan ǵumyr" deıtin pesa jazyp, sahnalatty. Soǵan "Órge tartty aq keme" degen kóldeı reenzııa-esse jazyp, spektakldy ishin keptirip maqtadym. Marqum Raqańnyń kóńili úshin bolýy kerek, dese de obektıvti turde spektakldiń bas keıipkerin jaqtaý, maqtaý bolyp shyqty. Órge tartyp bara jatqan aq keme...
Búginde tarıhtyń enshisine ótip bara jatqan beıýaq kezeńdi maqtaý naýqanyna qatysýym osy eki-aq jaǵdaı bolýy kerek. Biraq sonyń ózimen-aq men ómirlik ustanymyma adam aıtqysyz opasyzdyq jasaǵan ekenmin. Sebebin aıtaıyn.
Avtorlyǵy Brýno Iasenskııge telinetin bir sóz bar: «Dushpanyńnan qoryqpa — kóp bolsa atyp keter. Satqyndardan qoryqpa — kóp bolsa satyp keter. Nemquraıdylardan qoryq — olar atpaıdy da, satpaıdy da, biraq jer betindegi bútkil zulymdyq solardyń únsiz kelisimimen jasalady».
Kúshtiler men tistilerge jalbaqtadym dep aıta almaımyn, biraq solarǵa nemquraıdylyqpen qaraǵanym, sóıtip dármensizdik tanytqanym anyq.
Búgin — 29 mamyr. Meniń Arylý kúnim.
Qazaqty órkenıettik tyǵyryqqa ákep tirep tastap ketken 30 jyldyq" Aq kemeniń " tarıhy jazylýy tıis osy kúnderi árqaısymyzdyń óz Arylý kúnimiz bolýy tıis. Aıtyp arylatyn kún.
Ózgeden buryn ózińniń aldynda qadirińdi ketirmes úshin. Qalǵan ómirińde Kúnniń jaryǵyna týra qarap ótýiń úshin.
Maqsat Táj-Murat
