پرەزيدەنت قاسىم-جومارت توقاەۆ ەلىمىزدى الدا اۋقىمدى رەفورمالار مەن جاڭا قازاقستان قۇرىلىسى كۇتىپ تۇرعانىن ايتتى. مەملەكەت باسشىسى الماتىدا ناۋرىز مەرەكەسىنە ارنالعان قۇتتىقتاۋ سوزىندە ەكىنشى رەسپۋبليكا تۋرالى ايتتى، دەپ حابارلايدى "ادىرنا" ۇلتتىق پورتالى.
مەملەكەتتىك حاتشى ەرلان قارين توقاەۆتىڭ قۇتتىقتاۋ سوزىندە «ەكىنشى رەسپۋبليكا» دەگەن ءسوزدىڭ نەنى بىلدىرەتىنىن ءتۇسىندىردى.
قارين «ەكىنشى رەسپۋبليكا» جانە «جاڭا قازاقستان» ۇعىمدارىنىڭ ءمان-ماعىناسى ءبىر، تەك ەكپىنىمەن عانا ەرەكشەلەنەتىنىن اتاپ ءوتتى. جاڭا قازاقستان – جالپى ەل بولاشاعىنىڭ بەينەسى. ءبىز الەۋمەتتىك قۇندىلىقتاردى جاڭارتىپ، ۇلتتىڭ جاڭا ساپاسىن قالىپتاستىرۋ قاجەتتىلىگى تۋرالى ايتىپ وتىرمىز.
تيىسىنشە، بۇل قاڭتار وقيعاسىنان كەيىن نەمەسە جولداۋدان كەيىن ءبىز اۆتوماتتى تۇردە جاڭا قازاقستاندا تۇرا باستادىق دەگەندى بىلدىرمەيدى. ەلباسى «جاڭا قازاقستان» تۇجىرىمداماسىن العا تارتا وتىرىپ، تاياۋ بولاشاقتا مەملەكەت قۇرۋدىڭ جاڭا ماقساتىن بەلگىلەدى. جاڭا قازاقستاننىڭ قۇرىلىسى ءبىر ساتتە، ءبىر تۇندە بولۋى مۇمكىن ەمەس. بۇل الەۋمەتتىك ترانسفورماتسيانىڭ تەرەڭ جانە ۇزاق پروتسەسى.
ەرلان قارين
قارين توقاەۆتىڭ سۋپەرپرەزيدەنتتىك باسقارۋ تۇرىنەن كۇشتى پارلامەنتى بار پرەزيدەنتتىك رەسپۋبليكاعا تۇپكىلىكتى كوشۋ جونىندەگى باستامالارىن ەسكە سالدى. كونستيتۋتسيانىڭ 30-دان استام بابىنا جانە 20 زاڭعا وزگەرىستەر ەنگىزىلەدى دەپ كۇتىلۋدە.
سوندىقتان، جالپى العاندا، مەملەكەتتىك باسقارۋ مودەلىنىڭ وزگەرۋىنىڭ باستالۋى تۋرالى عانا ەمەس، مەملەكەتتىك جانە قوعامدىق دامۋ پاراديگماسىنىڭ وزگەرۋى تۋرالى دا ايتۋعا بولادى. ال بۇگىندە بۇل پروتسەستى ناقتىراق كورسەتۋ ءۇشىن پرەزيدەنت «ەكىنشى رەسپۋبليكا» دەگەن تەرميندى قولداندى. ونىڭ ۇستىنە، مەملەكەت باسشىسى العا قويعان ساياسي رەفورمالاردى جۇزەگە اسىرۋ بيىلعى جىلعا جوسپارلانعاندىقتان، ەكىنشى رەسپۋبليكا قازىردىڭ وزىندە وتە جاقىن جانە ناقتى ماقسات بولىپ تابىلادى.
ەرلان قارين
مەملەكەتتىك حاتشى جاڭا قازاقستان – قوعام مەن ۇلتتىڭ جاڭارۋى، ال ەكىنشى رەسپۋبليكا – مەملەكەتتىك ۇلگىنىڭ جاڭارۋى دەپ تۇيىندەدى.
"ادىرنا" ۇلتتىق پورتالى
