“باعانى زاڭسىز وسىرگەن”: داريعا نازارباەۆانىڭ بيزنەس سحەماسىنا تەرگەۋ جۇرگىزىلۋدە

2584
Adyrna.kz Telegram
 فوتو: Tengrinews
فوتو: Tengrinews

نازارباەۆ اۋلەتىنىڭ اكتيۆتەرى مەملەكەتكە قايتارىلىپ جاتىر. بۇل تۋرالى Dalainside Telegram ارناسى جاريالادى، دەپ حابارلايدى “ادىرنا” ۇلتتىق پورتالى.

مالىمەت بويىنشا، قارجى مونيتورينگ اگەنتتىگى داريعا نازارباەۆانىڭ قازاقستان - قىتاي شەكاراسىنداعى بيزنەس سحەماسىنا تەرگەۋ جۇرگىزۋدە. سەبەبى قىتاي مەن قازاق شەكاراسىنداعى "نۇرلى جول" بەكەتىنە قاراستى ۇزىندىعى 3 كم جولدى نازارباەۆانىڭ Eurotransit Nur Zholy كومپانياسى پايدا كوزىنە اينالدىرعان.

قازاق شەكاراسىنان وتكەسىن ساۋداگەرلەر نەيترالدى اۋماقتا ورنالاسقان ساۋدا ورتالىعىنا بارىپ، وزدەرىنە كەرەگىن ساتىپ الادى. سودان سوڭ جۇك پەن جولاۋشىنى جوعارىدا ايتقان Eurotransit Nur Zholy-نىڭ كولىكتەرى شەكارا ماڭىنا دەيىن جەتكىزەدى. شەكاراعا دەيىنگى جول ۇزاقتىعى نەبارى ءۇش-اق شاقىرىم. ال جولاۋشىلار وسى ءۇش شاقىرىمدى ءجۇرىپ ءوتۋ ءۇشىن كومپانيانىڭ لوگيستيكا قىزمەتىنە جۇگىنىپ، قوماقتى اقشا تولەۋگە ءماجبۇر بولعان.

جۇك جانە جولاۋشى تاسىمالداۋ ىسىمەن اينالىساتىن وزگە كومپانيالاردى بۇل جەرگە جولاتپاعان. وسىلايشا Eurotransit Nur Zholy كومپانياسى قورعاستاعى جەكە-دارا مونوپوليسكە اينالعان.

نازارباەۆاعا تيەسىلى "نۇرلى جول" بەكەتىن سالۋعا "ەۋرازيا بانكىنەن" 100 ملن دوللار بولىنگەن. قارجى مونيتورينگى اگەنتتىگى وسىعان دەيىن كومپانيا قىتاي حالىق رەسپۋبليكاسىنىڭ بەيتاراپ اۋماعىنان قازاقستان رەسپۋبليكاسىنا جۇك تاسىمالداۋشى جالعىز وپەراتور بولا تۇرا، اتالعان قىزمەتكە باعانى زاڭسىز وسىرگەنىن مالىمدەگەن ەدى.

بۇل كومپانيا مونوپوليستىك قىزمەتتەن 4,2 ملرد تەڭگە تابىس تاپقان. تەرگەۋ بارىسىندا Eurotransit Nur Zholy جشس كىنانى تولىعىمەن مويىندادى. سونداي-اق قۇنى 5,3 ملرد تەڭگەدەن اساتىن جشس اكتيۆتەرىن (اۋماعىندا كولىك-لوگيستيكالىق ۇيىم ورنالاسقان 3,6 گا جەر تەلىمى) مەملەكەتكە بەرۋ تۋرالى ءوتىنىش جازعان.

پىكىرلەر