قوستاناي وبلىسىندا زاڭسىز تاكسي قىزمەتىمەن اينالىسقان ازامات اكىمشىلىك جاۋاپكەرشىلىككە تارتىلدى، دەپ حابارلايدى «ادىرنا» ءتىلشىسى.
جىتىقارا اۋداندىق سوتىنىڭ مالىمەتىنشە، 2025 جىلعى 16 شىلدەدە پوليتسيا ءبولىمىنىڭ تاقىرىپتىق تەكسەرۋ جۇرگىزۋ بارىسىندا پريگورودنوە اۋىلىندا ۋ. ەسىمدى ەر ادام باسقارعان «TOYOTA» ماركالى اۆتوكولىك توقتاتىلعان. ول جىتىقارا – قوستاناي باعىتى بويىنشا جولاۋشىلاردى تاسىمالداۋمەن اينالىسقان. اۆتوكولىكتە 4 جولاۋشى بولعان، ولاردىڭ ءبىرى جىتىقارا – قوستاناي باعىتىمەن كەلە جاتقانىن راستاعان جانە جولاقى ءۇشىن 5000 تەڭگە تولەپ، تولەم تۇبىرتەگىن كورسەتكەن.
ەر ادامنىڭ جەكە كاسىپكەر رەتىندە تىركەلمەگەنى جانە قىزمەتىن باستاعانى تۋرالى حابارلاما بەرمەگەنى، سوعان قاراماستان اقىلى نەگىزدە جەكە تۇلعالاردى تاسىمالداۋ قىزمەتىن جۇزەگە اسىرعانىن اتاپ ءوتىلدى.
سوت قر اقبتك-ءنىڭ 463-بابىنىڭ 1-بولىگىنە سايكەس ازاماتقا 15 اەك مولشەرىندە ايىپپۇل سالدى. قر اقبتك-ءنىڭ 829-11-بابىنىڭ 2-بولىگىن قولدانا وتىرىپ، ايىپپۇل 30 پايىزعا قىسقارتىلىپ، 41 286 تەڭگە كولەمىندە بەلگىلەندى.
قوسىمشا جازا جانە كولىكتى تاركىلەۋ شاراسى قولدانىلعان جوق. قاۋلى زاڭدى كۇشىنە ەندى.
