ساۋد ارابياسىنىڭ استاناسى ەر-ريادتا ەتنوسپورت جانە مادەنيەت فەستيۆالى العاش رەت ۇيىمداستىرىلىپ جاتىر، دەپ حابارلايدى "ادىرنا" ۇلتتىق پورتالى.
TRT دەرەگىنشە، ون كۇنگە جوسپارلانعان شارا 19-28 قاراشا ارالىعىندا «ەر-رياد ماۋسىمى» اياسىندا «الەم داستۇرلەرى ەر-ريادتا» ۇرانىمەن وتەدى.
فەستيۆال بۇعان دەيىن تۇركيادا ۇيىمداستىرىلىپ كەلگەن. بيىل العاش رەت ساۋد ارابياسىندا ءوتىپ وتىر.
اشىلۋ سالتاناتىندا دۇنيەجۇزىلىك ەتنوسپورت كونفەدەراتسياسىنىڭ پرەزيدەنتى نەدجمەددين بيلال ەردوعان فەستيۆال تۇركيا مەن ساۋد ارابياسى اراسىنداعى بايلانىستى نىعايتىپ، جاڭا ىنتىماقتاستىق مۇمكىندىكتەرىنە جول اشادى دەگەن ءۇمىت ءبىلدىردى.
ونىڭ ايتۋىنشا، ەكى ەلدى ورتاق سەنىم، تاريحي مۇرا جانە حالىقتار اراسىنداعى بەرىك بايلانىس بىرىكتىرەدى.
فەستيۆال باعدارلاماسىنا ءداستۇرلى سپورتتىق جارىستار، حالىق ويىندارى، قولونەر كورمەلەرى مەن ءتۇرلى ەلدەردىڭ ۇلتتىق تاعامدارى ەنگىزىلگەن. ءىس-شارالار بالالارعا، جاستارعا، ايەلدەرگە جانە بارلىق جاستاعى كەلۋشىلەرگە ارنالعان.
نەدجمەددين بيلال ەردوعاننىڭ مالىمەتىنشە، دۇنيەجۇزىلىك ەتنوسپورت كونفەدەراتسياسىنىڭ قۇرامىنا بەس قۇرلىقتاعى 34 ەلدەن 56 ۇيىم مۇشە. ۇيىم ءداستۇرلى سپورت تۇرلەرى مەن حالىق ويىندارىن ساقتاپ، مادەني مۇرانى كەيىنگى ۇرپاققا جەتكىزۋدى ماقسات ەتەدى.
ول كۇرەس، ات سپورتى جانە ساداق اتۋدىڭ دا تاريحي-مادەني مۇراداعى ورنىنا توقتالدى. ونىڭ پىكىرىنشە، ءداستۇرلى سپورت تۇرلەرى حالىقتاردىڭ ءوز تامىرى مەن ورتاق قۇندىلىقتارىن ۇمىتپاۋىنا ىقپال ەتەدى.
