قازاقستاننىڭ سىرتقى ىستەر مينيسترلىگى گرەكيادا جازاسىن وتەپ جاتقان قازاقستاندىق ازاماتقا قاتىستى جاعدايعا تۇسىنىكتەمە بەردى، دەپ حابارلايدى “ادىرنا”.
ۆەدومستۆونىڭ مالىمەتىنشە، ازامات گرەكيا سوتىنىڭ شەشىمىمەن زاڭسىز ميگرانتتاردى تاسىمالداعانى ءۇشىن كىنالى دەپ تانىلىپ، سوتتالعان. گرەكيا زاڭناماسىنا سايكەس، مۇنداي قىلمىس اسا اۋىر ساناتقا جاتادى.
«گرەكياداعى ءبىزدىڭ ديپلوماتتار ءوز قۇزىرەتى شەڭبەرىندە ازاماتقا قاجەتتى كونسۋلدىق-قۇقىقتىق كومەك كورسەتىپ جاتىر. بۇل ماسەلە مينيسترلىكتىڭ باقىلاۋىندا»، – دەدى ۆەدومستۆونىڭ رەسمي وكىلى ەرلان جەتىباەۆ.
ەسكە سالايىق، بۇعان دەيىن اقتوبە قالاسىنىڭ تۇرعىنى نۇرحان قادىروۆا ۇلىنىڭ ىسىنە بايلانىستى قازاقستاننىڭ سىرتقى ىستەر مينيسترلىگىنەن كومەك سۇراعان بولاتىن. اناسىنىڭ ايتۋىنشا، ونىڭ ۇلى ەكى جىلعا جۋىق ۋاقىتتان بەرى گرەكيا تۇرمەسىندە وتىر جانە سوت ونى 125 جىلعا باس بوستاندىعىنان ايىرعان.
ايەلدىڭ سوزىنشە، ۇلى شەتەلگە كەتەر الدىندا بۇل تۋرالى جاقىندارىنا ايتپاعان. كەيىن ونىڭ تۇركياعا جۇمىسقا كەتكەنى بەلگىلى بولعان. ءبىراز ۋاقىت وتكەن سوڭ، جاس جىگىت گرەكيا تۇرمەسىنەن حابارلاسقان.
اناسىنىڭ مالىمدەۋىنشە، ۇلى Instagram الەۋمەتتىك جەلىسىندەگى جۇمىس تۋرالى حابارلاندىرۋعا سەنىپ، جول اقىسى تولەنەتىن جانە تۋريستەرمەن جۇمىس ىستەۋ ۇسىنىلعان قىزمەتكە كەلىسكەن. الايدا كەيىن ول زاڭسىز ميگرانتتاردى تاسىمالداۋ ىسىنە تارتىلعان بولۋى مۇمكىن.
نۇرحان قادىروۆا ۇلىنىڭ قىلمىستىق سحەمانى ۇيىمداستىرماعانىن، كەرىسىنشە، الداۋ قۇربانى بولعانىن ايتادى.
