قازاقستاننىڭ بىرنەشە قالاسىندا جۇرگىزىلگەن ارنايى وپەراتسيالار ناتيجەسىندە كۇشتى اسەر ەتەتىن پرەپاراتتاردىڭ زاڭسىز اينالىمىنا قاتىسى بار ەكى قىلمىستىق توپتىڭ جولى كەسىلدى. قازان ايىندا كوكشەتاۋ، ششۋچينسك، بۋراباي كۋرورتتىق ايماعى، قاراعاندى جانە تەمىرتاۋ قالالارىندا وتكەن جەدەل ءىس-شارالار بارىسىندا 21 ادام ۇستالدى، دەپ حابارلايدى "ادىرنا".
العاشقى قىلمىستىق توپتىڭ 11 مۇشەسى كوكشەتاۋ، ششۋچينسك جانە بۋراباي اۋماعىندا پرەپاراتتاردى جەتكىزۋ مەن ساتۋدى ۇيىمداستىرعان. ۇستالعانداردىڭ قاتارىندا فارماتسەۆتيكالىق كومپانيالاردىڭ باسشىلارى مەن قىزمەتكەرلەرى، سونداي-اق كۋرەرلەر بار. ءتىنتۋ كەزىندە 50 مىڭنان استام قۇتى «تروپيكامەد» پرەپاراتى جانە سوعان ۇقساس وزگە دارىلەردىڭ شامامەن 4 مىڭ بىرلىگى تاركىلەندى. بۇدان بولەك، اتىس قارۋى، وق-دارىلەر، اۆتوكولىكتەر جانە ءىرى كولەمدەگى اقشا، ونىڭ ىشىندە شەتەل ۆاليۋتاسى تابىلدى.
ەكىنشى توپ قاراعاندى مەن تەمىرتاۋ قالالارىندا ارەكەت ەتكەن. ونىڭ قۇرامىنا جەرگىلىكتى قىلمىستىق ورتاعا قاتىسى بار 10 ادام كىرگەن. تەرگەۋ مالىمەتىنشە، ولار قاراعاندى وبلىسىندا كۇشتى اسەر ەتەتىن پسيحوتروپتىق پرەپاراتتاردى زاڭسىز ساتۋمەن اينالىسقان. كۇدىكتىلەردى ۇستاۋ كەزىندە پسيحواكتيۆتى زاتتار، تراۆماتيكالىق جانە سۋىق قارۋ تاركىلەندى.
قازىرگى تاڭدا اتالعان ەكى وقيعا بويىنشا سوتقا دەيىنگى تەرگەۋ امالدارى جالعاسىپ جاتىر. ىشكى ىستەر مينيسترلىگىنىڭ حابارلاۋىنشا، ارنايى وپەراتسيالاردىڭ ناتيجەسىندە قاۋىپتى پرەپاراتتاردى زاڭسىز تاراتۋ ارنالارىنىڭ بىرنەشەۋى جويىلىپ، اينالىمنان ەسىرتكىلىك جانە پسيحوتروپتىق اسەرى بار ونىمدەردىڭ ەداۋىر كولەمى الىندى.
