Nazarbaev áýletiniń aktıvteri memleketke qaıtarylyp jatyr. Bul týraly Dalainside Telegram arnasy jarııalady, dep habarlaıdy “Adyrna” ulttyq portaly.
Málimet boıynsha, qarjy monıtorıng agenttigi Darıǵa Nazarbaevanyń Qazaqstan - Qytaı shekarasyndaǵy bıznes shemasyna tergeý júrgizýde. Sebebi qytaı men qazaq shekarasyndaǵy "Nurly jol" beketine qarasty uzyndyǵy 3 km joldy Nazarbaevanyń Eurotransit Nur Zholy kompanııasy paıda kózine aınaldyrǵan.
Qazaq shekarasynan ótkesin saýdagerler neıtraldy aýmaqta ornalasqan saýda ortalyǵyna baryp, ózderine keregin satyp alady. Sodan soń júk pen jolaýshyny joǵaryda aıtqan Eurotransit Nur Zholy-nyń kólikteri shekara mańyna deıin jetkizedi. Shekaraǵa deıingi jol uzaqtyǵy nebári úsh-aq shaqyrym. Al jolaýshylar osy úsh shaqyrymdy júrip ótý úshin kompanııanyń logıstıka qyzmetine júginip, qomaqty aqsha tóleýge májbúr bolǵan.
Júk jáne jolaýshy tasymaldaý isimen aınalysatyn ózge kompanııalardy bul jerge jolatpaǵan. Osylaısha Eurotransit Nur Zholy kompanııasy Qorǵastaǵy jeke-dara monopolıske aınalǵan.
Nazarbaevaǵa tıesili "Nurly jol" beketin salýǵa "Eýrazııa bankinen" 100 mln dollar bólingen. Qarjy monıtorıngi agenttigi osyǵan deıin kompanııa Qytaı Halyq Respýblıkasynyń beıtarap aýmaǵynan Qazaqstan Respýblıkasyna júk tasymaldaýshy jalǵyz operator bola tura, atalǵan qyzmetke baǵany zańsyz ósirgenin málimdegen edi.
Bul kompanııa monopolıstik qyzmetten 4,2 mlrd teńge tabys tapqan. Tergeý barysynda Eurotransit Nur Zholy JShS kináni tolyǵymen moıyndady. Sondaı-aq quny 5,3 mlrd teńgeden asatyn JShS aktıvterin (aýmaǵynda kólik-logıstıkalyq uıym ornalasqan 3,6 ga jer telimi) memleketke berý týraly ótinish jazǵan.
