بۋرابايداعى «بالداۋرەن» ساۋىقتىرۋ ورتالىعىندا كوز جۇمعان ءجاسوسپىرىمنىڭ ەشقانداي ونكولوگيالىق اۋرۋى بولماعان. دارىگەرلەر لاگەرگە كەتەردەن بەس كۇن بۇرىن عانا تولىق مەديتسينالىق تەكسەرۋدەن وتكەن نۇرداۋلەت ماناپتىڭ دەنساۋلىعىنان ەش كىنارات تاپپاعان، دەپ حابارلايدى «ادىرنا» ءتىلشىسى «كتك» ارناسىنا سىلتەمە جاساپ.
«ءبىز ساراپتاما تۇجىرىمىمەن مۇلدەم كەلىسپەيمىز! ونىڭ اعزاسىندا قانى از، بويىندا قاتەرلى ىسىك بار دەۋى ءتىپتى دۇرىس ەمەس. لاگەرگە بارار الدىندا عانا تولىق تەكسەرىستەن ءوتتى. سول كەزدە قاتەرلى ىسىكتىڭ ءبىر بەلگىسى بولماس پا ەدى؟! تاپتازا، ەش سىرقات تابىلماعان. ءبىز بۇنى بۇلاي قالدىرمايمىز»،—دەدى حرومتاۋ اۋدانى اۋرۋحاناسىنىڭ باس دارىگەرى ماقسات سەرعازين.
نۇرداۋلەت ماناپ لاگەرگە اتتانار الدىندا تەكسەرىستەن ءوتىپتى. ءاناليزىنىڭ ءبارى دۇرىس بولعان دەيدى دارىگەرلەر. ونىڭ ۇستىنە ءجاسوسپىرىم ەشقانداي ەسەپتە تۇرماعان. ءتىپتى ونكولوگيا اۋرۋى دا بولماپتى. الايدا بالانىڭ دەنەسىنە ساراپتاما جاساعان كوكشەتاۋداعى ماماندار مارقۇم قاتەرلى ىسىكتەن كوز جۇمدى دەپ وتىر. ءتىپتى ۇلىنىڭ دەنەسىن الىپ كەتۋگە كەلگەن تۋىستارىنا ناقتى ءولىم سەبەبى جازىلعان ءبىر جاپىراق قاعاز ۇستاتىپتى. بۋرابايداعى «بالداۋرەن» ساۋىقتىرۋ ورتالىعىنا دەمالۋعا كەلگەن 14 جاستاعى بالا كەشە كوز جۇمدى. نۇرداۋلەتتىڭ تۇنىمەن ءىشى اۋىرىپ، تاڭ اتا جەدەل جاردەم كەلگەنشە قايتىس بولدى دەيدى لاگەر باسشىلارى. اتالمىش وقيعاعا قاتىستى قازىر پوليتسيا تەرگەۋ جۇرگىزىپ جاتىر.
«11 قاڭتار كۇنى جاسالعان ساراپتامادا بالانىڭ ولىمىنە اعزانىڭ قان ازدىعى جانە جامباستا قاتەرلى ىسىكتىڭ پايدا بولۋى سەبەپ بولعان. تەرگەۋ جالعاسىپ جاتىر»،—دەپ ءتۇسىندىردى اقمولا وبلىسى پد ءباسپاسوز قىزمەتىنىڭ جەتەكشىسى گۇلنار پينچۋك.
