قازاق تەلەۆيزياسىنىڭ قالىپتاسۋىنا ۇلەس قوسقان العاشقى ديكتورلاردىڭ ءبىرى زۇلقيا مۇقانقىزى جۇماتوۆا 106 جاسىندا دۇنيەدەن وزدى، دەپ حابارلايدى "ادىرنا".
قارالى حاباردى وتاندىق تەلەۆيزيا مامانى ساۋلە جيرەنشينا الەۋمەتتىك جەلىدەگى پاراقشاسىندا جەتكىزدى.
زۇلقيا جۇماتوۆا 1920 جىلى 20 اقپاندا پاۆلودار وبلىسى باياناۋىل اۋدانىندا دۇنيەگە كەلگەن. 15 جاسىندا اناسىنان ايىرىلىپ، سەگىز بالانىڭ ۇلكەنى رەتىندە باۋىرلارىنا قامقور بولعان. ەكىنشى دۇنيەجۇزىلىك سوعىس جىلدارىندا زاۋىتتا ەڭبەك ەتكەن.
ونىڭ تەلەۆيزيا سالاسىنداعى قىزمەتى 1958 جىلى باستالدى. الماتى تەلەستۋدياسى اشىلار تۇستا ۇيىمداستىرىلعان ديكتورلار بايقاۋىندا 750 ۇمىتكەردىڭ اراسىنان ىرىكتەلىپ شىقتى. سول جىلدىڭ 8 ناۋرىزىندا نەللي وماروۆامەن بىرگە قازاق تەلەۆيزياسىنىڭ العاشقى ەفيرىن جۇرگىزگەن ديكتورلاردىڭ ءبىرى بولدى.
زۇلقيا مۇقانقىزى 1958–1970 جىلدارى قازاق تەلەۆيزياسىندا قىزمەت ەتىپ، ۇلتتىق تەلەەفيردىڭ قالىپتاسۋىنا اتسالىستى. ول تىكەلەي ەفيردە جۇمىس ىستەگەن العاشقى ديكتورلاردىڭ قاتارىندا بولدى.
تەلەۆيزياداعى قىزمەتىمەن قاتار ادەبي شىعارماشىلىقپەن دە اينالىستى. بالالارعا ارناپ ولەڭدەر مەن ەرتەگىلەر جازدى. ونىڭ «بوبەگىم» اتتى بەسىك جىرىنا كومپوزيتور باقىتجان بايقاداموۆ ءان شىعارعان. تۋىندىنى بەلگىلى ءانشى جامال وماروۆا ورىنداعان. سونداي-اق زۇلقيا جۇماتوۆا مەكتەپكە دەيىنگى جاستاعى بالالارعا ارنالعان «ماراتتىڭ تاڭداۋى» كىتابىن جازدى. ەڭبەك 200 مىڭ دانامەن جارىق كورگەن.
2026 جىلعى ماۋسىمدا مەملەكەت باسشىسى قاسىم-جومارت توقاەۆ وتاندىق جۋرناليستيكا مەن تەلەۆيزيا سالاسىنا سىڭىرگەن ەڭبەگى ءۇشىن زۇلقيا جۇماتوۆانى «قۇرمەت» وردەنىمەن ماراپاتتاعان.
ساۋلە جيرەنشينانىڭ مالىمەتىنشە، مارقۇممەن قوشتاسۋ ءراسىمى 15 قاراشا كۇنى ساعات 11:00-دە وتەدى.
