پاۆلودار وبلىسىندا 1200 باسقا ارنالعان ءسۇت-تاۋارلى فەرما ىسكە قوسىلدى. جوبا سەگىز اي ىشىندە جۇزەگە اسىرىلدى. جوعارى ساپالى ءسۇت وندىرەتىن جاڭا كەشەننىڭ اشىلۋىنا وبلىس اكىمى ابىلقايىر سقاقوۆ قاتىستى، دەپ جازادى "ادىرنا" ۇلتتىق پورتالى.
"AgroTrade PV" جشس-ءنىڭ ءسۇت-تاۋارلى فەرماسى پاۆلودار اۋدانىنداعى ولگينو اۋىلىندا ورنالاسقان. ونىڭ قۇرىلىسى 2022 جىلدىڭ ناۋرىزىندا باستالدى. فەرمانىڭ ديرەكتورى قۋانىش تەمىرعاليننىڭ ايتۋىنشا، مۇندا كۇنىنە 30 مىڭ ليترگە دەيىن ءسۇت ءوندىرۋ جوسپارلانىپ وتىر، ال، كاسىپورىن تولىق قۋاتتىلىق دەڭگەيىنە شىققان كەزدە جالپى ءوندىرىس كولەمى جىلىنا 10 مىڭ توننا ءسۇتتى قۇرايدى.
– قازىر بىزدە گولشتين-فريز تۇقىمدى 476 باس ءىرى قارا مال بار. تاعى دا قوسىمشا 1200 باس سيىر ساتىپ الۋ جوسپارلانۋدا، - دەدى فەرما ديرەكتورى. - جوبا مەملەكەتتىڭ قولداۋىمەن جۇزەگە اسىرىلدى. 40 سيىرعا شاقتالعان ساۋىن بلوگى ورناتىلدى. ءوندىرىستىڭ اۆتوماتتاندىرىلعان پروتسەسسى جانە ءسۇتتى تۇقىمدى سيىرلاردىڭ بولۋى جوعارى كورسەتكىشتەرگە قول جەتكىزۋگە مۇمكىندىك بەرەدى.
ءسۇت ءوندىرۋ كەشەنىندە 100-گە جۋىق جاڭا جۇمىس ورنى قۇرىلدى، جۇمىسكەرلەردىڭ نەگىزگى ۇلەسىن جەرگىلىكتى تۇرعىندار قۇرايدى. فەرمادا سۇتتەن بولەك كارتوپ، ءداندى داقىلدار مەن جەمدىك داقىلدار وسىرىلەدى. 1700 گا سۋارمالى جەر القاپتارى مال باسىن تولىق قامتاماسىز ەتەدى دەپ كۇتىلۋدە.
جالپى، وبلىس اكىمى اتاپ وتكەندەي، ءبىزدىڭ ءوڭىردىڭ اگروونەركاسىپتىك كەشەنى بارلىق باعىتتار بويىنشا قارقىندى دامىپ كەلەدى. ماسەلەن، سوڭعى ءۇش جىلدا سۋارمالى جەرلەردىڭ اۋدانى 40 مىڭ گەكتارعا ۇلعايىپ،142 مىڭ گەكتاردى قۇرادى.
- 2020 جىلدان باستاپ اۋىل شارۋاشىلىعى ءونىمىنىڭ جالپى كولەمى 1,8 ەسەگە ءوستى، - دەدى ابىلقايىر سقاقوۆ. - بۇل وتە جاقسى جەتىستىكتەر. ارينە، بۇنىڭ ءبارى سىزدەر سياقتى جەرلەستەرىمىزدىڭ ادال ەڭبەگىنىڭ جەمىسى. سىزدەر التى اي ىشىندە ساپالى كاسىپورىندى قۇرۋعا جانە ءوندىرىستى نولدەن باستاۋعا بولاتىندىعىن كورسەتسەڭىزدەر.
سۋرەتتەردى تۇسىرگەن ۆالەري بۋگاەۆ
بۇگىنگى تاڭدا وبلىستا 37 ءسۇت-تاۋارلى فەرماسى جۇمىس ىستەيدى. وڭىردە ءسۇت ءوندىرىسىن 43 مىڭ تونناعا ۇلعايتۋعا مۇمكىندىك بەرەتىن سەگىز جاڭا كەشەن سالۋ جوسپارلانىپ وتىر.
"ادىرنا" ۇلتتىق پورتالى
