26 قىركۇيەكتە پاۆلوداردىڭ ورتالىق جاعالاۋىندا، اشىق اسپان استىندا ورنالاسقان ERTIS PROMENADE ساحناسىنىڭ 2026 جىلعى جازعى ماۋسىمى قورىتىندىلانادى. بيىل جاعالاۋدا 300-دەن استام مادەني جانە ويىن-ساۋىق ءىس-شاراسى ۇيىمداستىرىلىپ، ولاردى 1 ميلليوننان استام كورەرمەن تاماشالادى.
جاز بويى ERTIS PROMENADE ساحناسىندا قازاقستاننىڭ جانە شەتەلدىڭ 40-تان استام تانىمال ءانشىسى ونەر كورسەتتى. سونىمەن قاتار پاۆلودار وبلىسىنىڭ قالالارى مەن اۋداندارىنان 2 700-دەن استام ونەرپاز بەن شىعارماشىلىق ۇجىم كورەرمەنگە ءوز ونەرىن ۇسىندى.
ماۋسىم اياسىندا كونتسەرتتەرمەن قاتار جاستارعا ارنالعان جوبالار، مادەني ءىس-شارالار، سپورتتىق جاتتىعۋلار، كوڭىلدى تاپقىرلار ويىندارى، اشىق اسپان استىنداعى وتاندىق كينو كورسەتىلىمدەرى جانە باسقا دا ءتۇرلى فورماتتاعى شارالار ءوتتى. بارلىق ءىس-شارالار تەگىن ۇيىمداستىرىلىپ، بۇل ERTIS PROMENADE-تى قالا تۇرعىندارى مەن قوناقتارى ءۇشىن قولجەتىمدى مادەني دەمالىس كەڭىستىگىنە اينالدىردى.
2018 جىلدان بەرى جۇمىس ىستەپ كەلە جاتقان ERTIS PROMENADE بۇگىندە پاۆلوداردىڭ باستى كورىكتى ورىندارىنىڭ بىرىنە اينالدى. جازعى ماۋسىمدا مۇندا قالا تۇرعىندارىمەن قاتار قازاقستاننىڭ باسقا وڭىرلەرىنەن جانە جاقىن شەتەلدىڭ شەكارالاس ايماقتارىنان كەلگەن قوناقتار دا باس قوسادى.
- اۋقىمدى كونتسەرتتەر مەن شىعارماشىلىق باعدارلامالار جاعالاۋدى قالانىڭ مادەني ءومىرىنىڭ ماڭىزدى ورتالىقتارىنىڭ بىرىنە اينالدىرىپ قانا قويماي، پاۆلوداردىڭ تۋريستىك الەۋەتىن تانىتۋعا دا مۇمكىندىك بەرىپ وتىر. مۇندا تۇرعىندار مەن قوناقتار مادەني دەمالىسپەن قاتار، جاعالاۋدىڭ تابيعي كورىنىسىن تاماشالاپ، وتباسىمەن جانە دوستارىمەن ۋاقىت وتكىزە الادى، - دەيدى پاۆلودار قالاسىنىڭ اكىمى حاسار حابىلبەكوۆ.
2026 جىلعى شىعارماشىلىق ماۋسىم 26 قىركۇيەكتە ساعات 19:00-دە وتەتىن ۇلكەن گالا-كونتسەرتپەن قورىتىندىلانادى. قورىتىندى كەشتە تانىمال قازاقستاندىق جانە شەتەلدىك ونەرپازدار ونەر كورسەتەدى. كەشتىڭ حەدلاينەرلەرى — ميراس جۇگىنىسوۆ، ALPHA, DARICORN جانە RAHMAN SATI. ارنايى قوناقتار قاتارىندا ماكسيم، LYRIQ جانە JAY SEAN بار.
ماۋسىمنىڭ جابىلۋ كەشى مەرەكەلىك وتشاشۋمەن اياقتالادى. وسىلايشا بيىلعى ERTIS PROMENADE ماۋسىمى جۇزدەگەن ءىس-شارانى قامتىپ، ميلليوننان استام كورەرمەندى بىرىكتىرگەن اۋقىمدى مادەني جوبا رەتىندە ءوز مارەسىنە جەتەدى.
