19 قىركۇيەكتە، پاۆلودار وبلىسىنىڭ اكىمى اسايىن بايحانوۆتىڭ باستاماسىمەن وڭىردە جالپىوبلىستىق سەنبىلىك ءوتتى. پاۆلودار قالاسىندا تازالىقپەن قاتار، جاسىل جەلەكتى جاڭارتۋ جۇمىستارىنا ەرەكشە كوڭىل ءبولىندى.
قالاداعى جاسىل جەلەكتى جاڭعىرتۋ جوباسى اياسىندا ساتباەۆ كوشەسىندە ەسكى اعاشتاردىڭ ورنىنا جاڭا ءتۇپ ۇساق جاپىراقتى جوكە وتىرعىزىلدى. بۇگىن مۇندا 60 كوشەت ەگىلدى. جوكە اعاشتارىن وتىرعىزۋ جۇمىستارى الداعى ۋاقىتتا دا جالعاسادى. كۇزگى ماۋسىمنىڭ سوڭىنا دەيىن قالا اۋماعىندا وسى تۇقىمداس تاعى 536 ءتۇپ اعاش وتىرعىزۋ جوسپارلانعان.
جالپى، بيىل پاۆلوداردا كوگالداندىرۋ جۇمىستارى اۋقىمدى كولەمدە جۇرگىزىلۋدە. كوكتەمدە جاڭا يپپودرومنىڭ شىعىس جاعىنداعى جاسىل بەلدەۋگە 9 مىڭ كوشەت وتىرعىزىلدى. كۇزدىڭ سوڭىنا دەيىن بۇل اۋماققا تاعى 10 مىڭعا جۋىق كوشەت ەگۋ كوزدەلگەن. وسىلايشا، جىل سوڭىنا دەيىن قالا اۋماعىندا شامامەن 20 مىڭ جاڭا كوشەت وتىرعىزىلادى.
بۇل جۇمىستار سوڭعى جىلدارداعى جۇيەلى كوگالداندىرۋ شارالارىنىڭ جالعاسى. 2023-2025 جىلدارى پاۆلوداردا قاراعاي، شىرشا، قايىڭ، شەتەن، ارشا جانە تاتار ۇيەڭكىسىن قوسا العاندا، 60 مىڭعا جۋىق كوشەت ەگىلدى.
بۇگىنگى سەنبىلىك بارىسىندا ۋسولكا كوپىرى ماڭىندا دا اۋقىمدى تازالىق جۇمىستارى جۇرگىزىلدى. وعان مەملەكەتتىك قىزمەتشىلەر، كاسىپكەرلەر، قوعامدىق ۇيىمداردىڭ وكىلدەرى، ەرىكتىلەر مەن قالا تۇرعىندارى قاتىستى.
«تازا قازاقستان» اكتسياسى اياسىنداعى بۇل جۇمىستار قالانىڭ تازالىعىن ساقتاپ قانا قويماي، پاۆلوداردىڭ جاسىل قورىن كوبەيتۋگە باعىتتالعان. ويتكەنى بۇگىن وتىرعىزىلعان ءاربىر كوشەت – قالانىڭ ەرتەڭگى كوركى مەن تۇرعىندارعا جايلى ورتانىڭ ءبىر بولىگى.
وڭىردە تازالىق ايلىعى 12-قازانعا دەيىن جالعاسادى.
