بيىل پاۆلودار قالاسىنىڭ جول ينفراقۇرىلىمىندا بۇرىن-سوڭدى بولماعان اۋقىمدى جۇمىس اتقارىلدى. پاۆلودار وبلىسىنىڭ اكىمى اسايىن بايحانوۆتىڭ قولداۋىمەن ءبىر عانا قۇرىلىس ماۋسىمىندا 23 ماگيسترالدىق كوشە جوندەلدى. بۇل – قالا تاريحىنداعى ەڭ اۋقىمدى جول جوندەۋ جۇمىستارىنىڭ ءبىرى.
جوندەلگەن كوشەلەردىڭ جالپى ۇزىندىعى 44,6 شاقىرىمدى قۇرايدى. ەڭ باستىسى، جۇمىستاردى جوسپارلاۋ كەزىندە تۇرعىنداردىڭ ۇسىنىستارى مەن وتىنىشتەرى ەسكەرىلدى. كوپتەگەن كوشە تۇرعىنداردىڭ كوتەرگەن ماسەلەسى نەگىزىندە جوندەۋ تىزىمىنە ەنگىزىلدى.
پاۆلودار قالاسىنىڭ اكىمى حاسار حابىلبەكوۆتىڭ ايتۋىنشا، بيىل نەگىزگى ماگيسترالدىق كوشەلەردىڭ باسىم بولىگىن جوندەۋدەن وتكىزۋگە مۇمكىندىك تۋدى.
«ايماق باسشىسى اسايىن قۋاندىقۇلىنىڭ قولداۋىمەن نەگىزگى ماگيسترالدىق كوشەلەردىڭ باسىم كوپشىلىگىن جوندەۋدەن وتكىزدىك. بۇل قالا تۇرعىندارىنىڭ جايلىلىعىنا جانە قاۋىپسىز قوزعالىسىنا ۇلكەن سەرپىن بولدى دەپ ەسەپتەيمىز»، – دەيدى قالا اكىمى.
جول جوندەۋ جۇمىستارى كەزىندە ساپاعا دا ەرەكشە نازار اۋدارىلدى. اسفالت توسەۋدە جاڭا تەحنولوگيا قولدانىلىپ، شيىرشىقتاستى-ماستيكالىق اسفالتبەتون پايدالانىلدى. بۇل ماتەريال جوعارى جۇكتەمەگە توزىمدىلىگىمەن جانە بەرىكتىگىمەن ەرەكشەلەنەدى.
تاعى ءبىر ماڭىزدى ناتيجە – نەگىزگى جۇمىستار جوسپارلانعان مەرزىمنەن بۇرىن اياقتالدى. جول جوندەۋ جۇمىستارىنىڭ باسىم بولىگى شىلدە ايىندا تولىق ءتامامدالدى.
ءبىر ماۋسىمدا 23 ماگيسترالدىق كوشەنىڭ جوندەلۋى – پاۆلوداردىڭ جول جەلىسىن جاڭارتۋداعى جاڭا بەلەس. بۇل – تەك اسفالت توسەۋ عانا ەمەس، تۇرعىنداردىڭ كۇندەلىكتى قوزعالىسىنا قولايلى جاعداي جاساپ، قالا كوشەلەرىنىڭ قاۋىپسىزدىگى مەن ساپاسىن ارتتىرۋعا باعىتتالعان جۇيەلى جۇمىس.
