الەۋمەتتىك جەلىدە "قاراعاندى وبلىسى، اقتوعاي اۋدانى، ايىرتاس اۋىلىنىڭ تۇرعىندارى مال شارۋاشىلىعىمەن اينالىسۋعا تىكۇشاق ساتىپ الدى" دەگەن سارىندا ۆيدەو تارادى. Adyrna.kz WhatsApp ارقىلى تاراعان حابارلامانىڭ قانشالىقتى راس ەكەنىن تەكسەرىپ كوردى.
وندا: "مىنەكەي، جاڭا قازاقستان قۇرامىز دەپ جاتىرمىز. سول سەبەپتى حالىق بولىپ جينالىپ اۋىلىمىزعا تىكۇشاق ساتىپ الدىق. قازىر مالدىڭ بارىندە GPS-چيپتەر بار. مىناۋ اپپاراتتار ارقىلى جىلقىلاردىڭ قاي جەردە جۇرگەنىن اۋىلدان كورىپ وتىرامىز. كىمنىڭ ءۇيىرى قايدا جاتىر ءبارىن كورسەتىپ تۇرادى. بۇل تەحنيكا كەراسينمەن ۇشادى. سوندىقتان ول جاعىن دا ويلاستىرىپ، جانارمايدى بيىلعا جەتەتىندەي تەگىس الدىرىپ قويدىق. اۋىلىمىز شالعايدا جاتقاننان كەيىن تىكۇشاق جەدەل-جاردەم مىندەتىن دە اتقارادى. مال شارۋاشىلىعىن دامىتامىز دەپ جاتىرمىز. ۇكىمەتكە اۋىز اشىپ قاراپ وتىرعاننان ەشتەنە تۇسپەيدى. سوندىقتان اۋىل تۇرعىندارى وزدەرى قاراجاتتارىن شىعارىپ، مىناداي تىكۇشاق ساتىپ الدى. بارلىعىڭىزعا وسىنداي تىكۇشاق ساتىپ الۋعا كەڭەس بەرەمىز. ءبىزدىڭ قاراعاندى وبلىسى، اقتوعاي اۋدانىندا ورنالاسقان ايىرتاس اۋىلى بۇرىنعى سەمەي وبلىسىمەن شەكتەسىپ جاتىر. ءبىز ەڭ الىس جاتقان اۋىل بولعاندىقتان حالىقتىڭ اۋىزبىرشىلىگىنىڭ ارقاسىندا وسىنداي تىكۇشاق الىندى", - دەلىنگەن.
ۇكىم: جالعان
اقتوعاي اۋدانى اكىمدىگىنىڭ ءباسپاسوز قىزمەتى Adyrna.kz رەداكتسياسىنا بۇل اقپاراتتىڭ شىندىققا جاناسپايتىنىن حابارلادى.
"ۆيدەودا باياندالعان مالىمەت جالعان ەكەنىن حابارلايمىز. ۆيدەوتۇسىرۋشىنىڭ ويدان قۇراستىرعان اقپاراتى. بۇل تىكۇشاق ەشقانداي دا اۋىل شارۋاشىلىعى جانۋارلارىن قاراۋ ءۇشىن جانە جەدەل-جاردەم قىزمەتىن اتقارمايدى. اتالمىش تىكۇشاق اقتوعاي اۋدانى اۋماعىنا گەولوگيالىق زەرتتەۋ، بارلاۋ جۇمىستارىن جۇرگىزۋ ءۇشىن ارنايى كەلگەن "Kazakhstan Fortescue LLP" كومپانياسىنىڭ مەنشىگىندەگى تىكۇشاق", - دەپ حابارلادى اۋدان اكىمدىگى.
"ادىرنا" ۇلتتىق پورتالى
