2022 جىلعى 16 قاراشادا قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ ۇيىمداستىرۋىمەن تۇركىستان قالاسىندا احمەت بايتۇرسىنۇلىنىڭ 150 جىلدىق مەرەيتويىنا ارنالعان حالىقارالىق تۇركىتانۋشىلار كونگرەسى ءوتتى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇتتىقتاۋ ءسوزىن تۇركىستان وبلىسى اكىمى دارحان ساتىبالدى وقىدى.
مەملەكەت باسشىسىنىڭ قۇتتىقتاۋىندا «ۇلت ۇستازى اتانعان احاڭ ءتۇبى ءبىر، تاريحى تامىرلاس ەلدەر ءۇشىن اسا قۇندى عىلىمي-تانىمدىق مۇرا قالدىردى. سول سەبەپتى ونى بارشا تۇركى جۇرتى قۇرمەت تۇتادى. ازەربايجان، باشقۇرت، وزبەك تۇرىك حالىقتارىنىڭ بەلگىلى عالىمدارى باس قوسقان بۇگىنگى كونگرەسس سونىڭ ايقىن دالەلى»، - دەلىنگەن.
كونگرەستە يۋنەسكو باس ديرەكتورىنىڭ ورىنباسارى راموس گابريەلانىڭ احمەت بايتۇرسىنۇلىنىڭ 150 جىلدىق مەرەيتويىنا ارنالعان قۇتتىقتاۋ ءسوزى بەينەجازبا ارقىلى بەرىلدى.
كونگرەستە تۇركسوي باس حاتشىسىنىڭ ورىنباسارى بيليال چاكىدجى قۇتتىقتاۋ ءسوزىن وقىدى.
قازاقستان رەسپۋبليكاسى عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ احمەت بايتۇرسىنۇلىنىڭ 150 جىلدىق مەرەيتويى اياسىندا اتقارىلعان ماڭىزدى ءىس-شارالار جونىندە بايانداما جاسادى.
ءىس-شاراعا قازاقستان، تۇركيا، ازەربايجان، وزبەكستان، رەسەي عالىمدارى قاتىسىپ، مازمۇندى باياندامالار جاسادى.
كونگرەسس اياسىندا احمەت بايتۇرسىنۇلىنىڭ 12 تومدىق جيناعىنىڭ، احمەت بايتۇرسىنۇلىنىڭ تاڭدامالى شىعارمالارىنىڭ 4 تىلدە (قازاق، ورىس، اعىلشىن، تۇرىك) ازىرلەنگەن كىتابىنىڭ، پروفەسسور قارجاۋباي سارتقوجاۇلىنىڭ «ورحون ەسكەرتكىشتەرىنىڭ تولىق اتلاسى» 3 تومدىعىنىڭ، فيلولوگيا عىلىمدارىنىڭ دوكتورى الماسبەك ابسادىقوۆتىڭ «سەرت»، «ۇستاز جولى» كىتاپتارىنىڭ تۇساۋكەسەرى ءوتتى.
تۇركسوي-دىڭ «احمەت بايتۇرسىنۇلى» مەدالىمەن جانە قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ «احمەت بايتۇرسىنۇلى» ۆەدومستۆولىق توسبەلگىسىمەن قازاقستان، تۇركيا، وزبەكستان عالىمدارى ماراپاتتالدى.
پلەنارلىق وتىرىس سەكتسيا وتىرىستارىمەن جالعاستى.
«احمەت بايتۇرسىنۇلى جانە تۇركى تىلدەرىنىڭ تەورياسى مەن تاريحى» سەكتسياسىنا قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، فيلولوگيا عىلىمدارىنىڭ دوكتورى، پروفەسسور شەرۋباي قۇرمانبايۇلى جەتەكشىلىك ەتتى.
«احمەت بايتۇرسىنۇلى جانە ءسوز ونەرى» سەكتسياسىنا «ەگەمەن قازاقستان» رەسپۋبليكالىق گازەتى» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى، فيلولوگيا عىلىمدارىنىڭ دوكتورى ديحان قامزابەكۇلى جەتەكشىلىك ەتتى.
«احمەت بايتۇرسىنۇلى جانە قوعامدىق-گۋمانيتارلىق عىلىمدار» سەكتسياسىنا قازاقستان رەسپۋبليكاسى ءبىلىم اكادەمياسىنىڭ كوررەسپوندەنت مۇشەسى، فيلولوگيا عىلىمدارىنىڭ كانديداتى ەربول تىلەشوۆ جەتەكشىلىك ەتتى.
كونگرەسس قورىتىندىسى بويىنشا قارار قابىلداندى.
