ۇلىستىڭ ۇلى كۇنى قارساڭىندا قازاق تاريحىنا قاتىستى تىڭ دەرەك تابىلدى، دەپ حابارلايدى “ادىرنا” ۇلتتىق پورتالى.
بۇل تۋرالى ەلدەس وردا Facebook پاراقشاسىندا جازدى.
ونىڭ سوزىنشە، 1907 جىلى شىققان «يسكرى» جۋرنالىندا ءىى مەملەكەتتىك دۋماعا مۇشە بولعان قازاق قايراتكەرلەرىنىڭ بۇرىن بەلگىسىز بەينەسى ساقتالعانى انىقتالدى.
«يسكرى» — 1901-1917 جىلدارى «رۋسسكوە سلوۆو» گازەتىنە قوسىمشا رەتىندە شىققان سۋرەتتى جۋرنال. ونداعى «دۋماداعى مۇسىلمان فراكتسياسى» اتتى سۋرەتتى حاباردا پاتشالىق رەسەي قۇرامىنداعى مۇسىلمان دەپۋتاتتارى بەينەلەنگەن. ولاردىڭ اراسىندا ءتورت قازاق قايراتكەرى بار. ءبىرىنشىسى - مۇحامەدجان تىنىشبايۇلى (جەتىسۋ وبلىسى), ەكىنشى - باقىتجان قاراتايۇلى (ورال وبلىسى), ءۇشىنشى - احمەت ءبىرىمجانۇلى (تورعاي وبلىسى), ءتورتىنشى - شايمەردەن قوسشىعۇلۇلى (اقمولا وبلىسى).
بۇل جاڭالىق الاش تاريحىن زەرتتەۋشىلەر ءۇشىن قۇندى دەرەك بولماق. ۇلت قايراتكەرلەرىنىڭ بەينەسى ولاردىڭ قوعامدىق-ساياسي قىزمەتىن تەرەڭىرەك زەرتتەۋگە مۇمكىندىك بەرەدى.
