تۇركىستان شاھارىندا ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمى ءوتىپ جاتىر، دەپ جازادى "ادىرنا" ۇلتتىق پورتالى.
اۋقىمدى ءىس-شاراعا ايماقتاعى ەلدەر پارلامەنت پالاتالارىنىڭ دەلەگاتسيالارى قاتىسۋدا. ەكى كۇنگە جالعاساتىن فورۋمدا ولار پارلامەنتارالىق قاتىناستاردى كەڭەيتۋدىڭ باسىم باعىتتارىن جانە ءبىرتۇتاس رۋحاني-مادەني كەڭىستىكتى دامىتۋدىڭ وزەكتى ماسەلەلەرىن تالقىلايدى.
قازاقستان پارلامەنتى سەناتىنىڭ توراعاسى ماۋلەن اشىمباەۆ ءوز سوزىندە ورتالىق ازيا ەلدەرى اراسىنداعى قارىم-قاتىناستى ءارى قاراي نىعايتۋ ءۇشىن وسىنداي كەزدەسۋلەردىڭ ماڭىزى زور ەكەنىن ايتتى. پالاتا سپيكەرى ايماقتاعى ەلدەردىڭ مەملەكەت باسشىلارىنىڭ بايلانىسى جوعارى دەڭگەيدە ەكەنىن دە تىلگە تيەك ەتتى. سونداي-اق ءوزارا ىنتىماقتاستىقتى جان-جاقتى جانە بەلسەندى دامىتۋعا پارلامەنت وكىلدەرى دە ءوز ۇلەستەرىن قوسۋى كەرەكتىگىن اتاپ ءوتتى.
فورۋمعا قاتىسىپ جاتقان قىرعىز، وزبەك، تاجىك جانە تۇرىكمەن دەلەگاتسيالارىن تيىسىنشە قىرعىزستان جوگوركۋ كەنەشىنىڭ توراعاسى نۇرلانبەك شاكيەۆ، وزبەكستان ولي ءماجليسى سەناتىنىڭ ءتورايىمى تانزيلا نارباەۆا، تاجىكستان مادجليسي نامويانداگون مادجليسي ولي توراعاسى ماحمادتوير زوكيرزودا جانە تۇرىكمەنستان مەدجليسىنىڭ توراعاسى گۋربانمۋرات اشىروۆ باستاپ كەلدى.
ءىس-شارا كەزىندە دەپۋتاتتار ورتالىق ازيا ەلدەرىنىڭ جان-جاقتى ستراتەگيالىق ىنتىماقتاستىعىن نىعايتۋ ماسەلەسىن جانە پارلامەنتتەردىڭ وسى ۇدەرىستەگى ءرولىن تالقىلايدى. سونىمەن قاتار فورۋمعا قاتىسۋشىلار ورتاق تاريحي-رۋحاني مۇراعا نەگىزدەلگەن مادەني-گۋمانيتارلىق ىنتىماقتاستىقتى كەڭەيتۋ بارىسىنا نازار اۋدارادى.
فورۋمنىڭ قورىتىندىسى بويىنشا تۇركىستان دەكلاراتسياسى قابىلدانادى. قۇجاتتا ەكونوميكالىق ءوزارا ءىس-قيمىلدى كەڭەيتۋگە جانە وزىندىك بىرەگەيلىگىمەن ەرەكشەلەنەتىن ورتالىق ازيانىڭ ءبىرتۇتاس مادەني-تاريحي كەڭىستىگىن قالىپتاستىرۋعا ارنالعان پارلامەنتارالىق قاتىناستاردى ودان ءارى دامىتۋ پەرسپەكتيۆالارى كورسەتىلەدى.
ايتا كەتەيىك، اتالعان پارلامەنتارالىق فورۋمدى وتكىزۋ تۋرالى شەشىم بىلتىر شىلدە ايىندا وتكەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىندە قابىلداندى.
"ادىرنا" ۇلتتىق پورتالى
