اقمولا وبلىسىندا 2026 جىلدىڭ باسىنان بەرى 26 مىڭعا جۋىق جاڭا جۇمىس ورنى قۇرىلدى. ونىڭ 21 مىڭنان استامى تۇراقتى جۇمىس ورىندارى. بۇل بەلگىلەنگەن جىلدىق جوسپاردىڭ 108,5 پايىزىنا تەڭ. وڭىردە حالىقتى جۇمىسپەن قامتۋ، جۇمىسسىز ازاماتتاردى ەڭبەككە تارتۋ جانە كاسىپتىك دايارلاۋ باعىتىنداعى جۇمىستار جالعاسىپ جاتىر، دەپ حابارلايدى Adyrna ءتىلشىسى.
اقمولا وبلىسىنىڭ جۇمىسپەن قامتۋدى جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنشە، 2026 جىلدىڭ ەكىنشى توقسانىندا وڭىردەگى جالپى جۇمىسسىزدىق دەڭگەيى 4,4 پايىزدى، ال جاستار اراسىنداعى جۇمىسسىزدىق 2,7 پايىزدى قۇراعان.
جىل باسىنان بەرى جۇمىسپەن قامتۋ ورگاندارىنا 20 706 ادام جۇگىنگەن. ونىڭ ىشىندە 13 602 ازامات جۇمىسقا ورنالاسىپ، ءوتىنىش بىلدىرگەندەردىڭ 65,7 پايىزى ەڭبەكپەن قامتىلعان.
«بوس جۇمىس ورىندارىنا قولجەتىمدىلىكتى ارتتىرۋ ماقساتىندا وبلىستا 155 جارمەڭكە ۇيىمداستىرىلدى. جۇمىس بەرۋشىلەر 7 288 بوس جۇمىس ورنىن ۇسىنعان. جارمەڭكەلەر ناتيجەسىندە 163 ادام تۇراقتى جۇمىسقا ورنالاسسا، 67 ازامات قوعامدىق جۇمىستارعا، الەۋمەتتىك جۇمىس ورىندارىنا، جاستار پراكتيكاسىنا جانە كاسىپتىك وقىتۋعا جولدانعان. كاسىپتىك دايارلاۋ باعىتىندا دا جوسپارلى كورسەتكىش ورىندالدى. قىسقا مەرزىمدى كاسىپتىك وقىتۋعا 300 ادامدى قامتۋ كوزدەلگەنىمەن، 1 قاراشاداعى جاعداي بويىنشا 310 ازامات وقۋدان ءوتتى. بۇل جوسپاردىڭ 103 پايىزىن قۇرايدى»، - دەپ اتاپ ءوتتى باسقارمادان.
سونىمەن قاتار الەۋمەتتىك وسال ساناتتاعى ازاماتتاردىڭ كاسىپكەرلىك باستامالارىن قولداۋ ءۇشىن 334,3 ميلليون تەڭگە قاراستىرىلعان. وسى قاراجات ەسەبىنەن 270 مەملەكەتتىك گرانت بەرۋ جوسپارلانعان. ءبىرىنشى كەزەڭنىڭ قورىتىندىسى بويىنشا 104 ازاماتقا جالپى سوماسى 37 ميلليون تەڭگە گرانت بەرىلدى.
جالپى، جىل باسىنان بەرى جۇمىسپەن قامتۋدىڭ بەلسەندى شارالارىنا 2 155 ادام قاتىسقان. ولاردىڭ قاتارىندا قوعامدىق جۇمىستارعا تارتىلعاندار، جاستار پراكتيكاسىنا قاتىسۋشىلار جانە «كۇمىس جاس» جوباسى اياسىندا جۇمىسقا ورنالاسقان ازاماتتار بار.
ء«بىزدىڭ باستى مىندەتىمىز - تەك جاڭا جۇمىس ورىندارىن اشۋ ەمەس، ولاردىڭ تۇراقتى بولۋىن قامتاماسىز ەتۋ. سەبەبى جۇمىسپەن قامتۋ ساياساتىنىڭ ناتيجەسى قۇرىلعان جۇمىس ورىندارىنىڭ سانىمەن عانا ەمەس، ازاماتتاردىڭ تۇراقتى تابىس تابۋىنا، كاسىبي دامۋىنا جانە ەڭبەك نارىعىندا ءوز ورنىن تابۋىنا جاسالعان مۇمكىندىكتەرمەن ولشەنەدى»، - دەپ تولىقتىردى باسقارمادان.
