اقتوبە وبلىسىنىڭ حرومتاۋ اۋدانىنداعى «قازحروم» كومپانياسىنا تيەسىلى شاحتادا جۇمىسشى كوز جۇمدى. بۇل – سوڭعى توعىز كۇندە ءدوڭ تاۋ-كەن بايىتۋ كومبيناتىندا تىركەلگەن ەكىنشى ادام ءولىمى، دەپ حابارلايدى "ادىرنا".
قايعىلى وقيعا 29 قازاندا ERG قۇرامىنا كىرەتىن «قازحروم» كومپانياسىنىڭ قازاقستان تاۋەلسىزدىگىنىڭ 10 جىلدىعى اتىنداعى شاحتاسىندا بولعان.
كومپانيانىڭ حابارلاۋىنشا، تاۋ-كەن جۇمىسشىسى ۆاگونداردى تىركەۋ بارىسىندا جاراقات العان. وقيعا ورنىنان ول شۇعىل تۇردە حرومتاۋ اۋداندىق اۋرۋحاناسىنا جەتكىزىلگەن. الايدا دارىگەرلەر قانشا كۇش سالعانىمەن، ونىڭ ءومىرىن ساقتاپ قالا المادى.
«قازحروم» كومپانياسى مارقۇمنىڭ تۋىستارى مەن جاقىندارىنا كوڭىل ايتىپ، وتباسىنا قاجەتتى كومەك كورسەتىلەتىنىن مالىمدەدى.
وقيعا جونىندە ءتيىستى مەملەكەتتىك ورگاندارعا حابار بەرىلگەن. جۇمىسشىنىڭ قازا بولۋ سەبەپتەرى مەن ءمان-جايىن انىقتاۋ ءۇشىن ارنايى كوميسسيا قۇرىلادى. ونىڭ قۇرامىنا اقتوبە وبلىسىنىڭ ەڭبەك ينسپەكتسياسى وكىلدەرى دە كىرەدى.
ايتا كەتەيىك، بۇعان دەيىن، 20 قازاندا، وسى ءدوڭ تاۋ-كەن بايىتۋ كومبيناتىنا قاراستى «بولاشاق» شاحتاسىندا دا ادام ءولىمى تىركەلگەن. كەنشىلەر جەر استىندا قورعانىش تىرەكتەرىن ورناتىپ جاتقان كەزدە تاۋ جىنىسى وپىرىلىپ، جۇمىسشىلاردىڭ ءبىرىن باسىپ قالعان. ول العان جاراقاتىنان وقيعا ورنىندا كوز جۇمعان ەدى.
