«ابىلاي حان ورداسىنان جيدەلى-بايسىنعا (بايسۋن) دەيىن» اتتى حالىقارالىق تاريحي، مادەني-رۋحاني ەكسپەديتسياسى ساپارىن اياقتاپ، كوكشەتاۋعا ورالدى.
ەسكە سالا كەتەيىك، تاريحي ەكسپەديتسيا رەسپۋبليكا كۇنى قارساڭىندا بۋراباي اۋدانىنداعى ابىلاي حان الاڭىنان جولعا شىققان بولاتىن. بۇگىن ەكسپەديتسيا مۇشەلەرىن الدىمەن بۋرابايدا قارسى الۋ ءراسىمى ءوتىپ، كەيىن كوكشەتاۋ قالاسىنداعى اقمولا وبلىسى ىشكى ساياسات باسقارماسى جانىنداعى «قوعامدىق كەلىسىم» كمم-ءنىڭ كونفەرەنتس-زالىندا ساپار قورىتىندىسىنا ارنالعان كەزدەسۋ ۇيىمداستىرىلدى.
جيىنعا اقمولا وبلىسى ىشكى ساياسات باسقارماسى باسشىسىنىڭ ورىنباسارى سابىرحان كەنجەباەۆ قاتىستى.
كەزدەسۋ بارىسىندا ەكسپەديتسيا جەتەكشىسى، قوعام قايراتكەرى، ولكەتانۋشى، جازۋشى مۇرات قاجى ىدىرىسۇلى ساپاردىڭ بارىسى، وزبەكستان اۋماعىنداعى تاريحي ورىندار مەن عىلىمي مەكەمەلەردە وتكەن كەزدەسۋلەر، زەرتتەۋ جۇمىستارى تۋرالى باياندادى.
ەكسپەديتسيانىڭ نەگىزگى ماقساتى – ابىلاي حان داۋىرىمەن بايلانىستى تاريحي باعىتتاردى زەردەلەۋ، قازاق جانە وزبەك حالىقتارىنىڭ ورتاق تاريحي-مادەني مۇراسىن زەرتتەۋ، كوشپەلىلەر وركەنيەتىنىڭ قۇندىلىقتارىن ناسيحاتتاۋ بولدى.
ساپار بارىسىندا جينالعان دەرەكتەر، فوتو جانە بەينەماتەريالدار الداعى ۋاقىتتا حالىقارالىق تاريحي ەكسپەديتسيانىڭ جيناق كىتابى مەن فوتوالبومىن ازىرلەۋگە نەگىز بولماق.
قورىتىندى كەزدەسۋ ەكسپەديتسيانىڭ عىلىمي-تانىمدىق ناتيجەلەرىن ورتاعا سالىپ، تاريحي مۇرانى بىرلەسىپ زەرتتەۋ مەن ناسيحاتتاۋدىڭ ماڭىزىن تالقىلاۋعا مۇمكىندىك بەردى.
