استانانىڭ "قازانات" يپپودرومى اۋماعىندا اقمولا وبلىسىنىڭ جارمەڭكەسى ءوتتى، دەپ حابارلايدى "ادىرنا".
بيىل اقمولا وبلىسىندا 6 ميلليون 200 مىڭ توننادان استام استىق جينالدى. گەكتارىنا ورتا ەسەپپەن 13,9 تسەنتنەر ءونىم الىنعان. ءوڭىر اكىمى بيىلعى استىق ساپاسى كوپجىلدىق ورتاشا كورسەتكىشتەن ايتارلىقتاي جوعارى ەكەنىن ايتتى.
جالپى استىق ءتۇسىمىنىڭ شامامەن 90 پايىزى – 3-سىنىپتى بيداي. ونىڭ 70 پايىزى جوعارى اقۋىزدى Hi-pro ساناتىنا جاتادى. سونىمەن قاتار بيىل وڭىردە العاش رەت شامامەن 850 مىڭ توننا مايلى داقىل تۇقىمى جينالعان.
اقمولا وبلىسىنىڭ اگرارلىق الەۋەتى ەلورداداعى ساۋدا الاڭىندا دا تانىستىرىلدى. «قازانات» يپپودرومىندا وتكەن اۋىل شارۋاشىلىعى جارمەڭكەسىنە ءوڭىردىڭ 17 اۋدانى مەن كوكشەتاۋ، قوسشى جانە ستەپنوگورسك قالالارىنان تاۋار وندىرۋشىلەر قاتىستى.
جارمەڭكەدە 140 ساۋدا ورنى ۇيىمداستىرىلىپ، 50-دەن استام ءونىم ءتۇرى ۇسىنىلدى. جالپى ساۋداعا شىعارىلعان ءونىم كولەمى 497 توننادان استى. سورەلەردە 124,96 توننا ەت جانە شۇجىق ونىمدەرى، 4 توننا بالىق پەن بالىق ونىمدەرى، 32 توننا ءسۇت جانە ءسۇت ونىمدەرى، 38 توننا ۇن، 215 توننادان استام كارتوپ پەن كوكونىس، 8 تونناعا جۋىق جارما، 11 توننا وسىمدىك مايى جانە 350 مىڭ دانا اسحانالىق جۇمىرتقا ساتىلدى. سونىمەن قاتار كەلۋشىلەر وتىن، وتىرعىزۋ ماتەريالدارى مەن باسقا دا ماۋسىمدىق تاۋارلاردى ساتىپ الا الدى. ونىمدەردىڭ باعاسى نارىقتاعى ورتاشا قۇننان 10–15 پايىزعا تومەن بولدى.
جارمەڭكە ساۋدا-ساتتىقپەن عانا شەكتەلگەن جوق. كەلۋشىلەرگە ارناپ كونتسەرتتىك باعدارلاما ۇيىمداستىرىلىپ، ءتۇرلى ويىن-ساۋىق شارالارى ءوتتى. كوپشىلىك ۆيكتورينالىق سۇراقتارعا جاۋاپ بەرىپ، ازىق-تۇلىك سالىنعان دوربالاردى سىيلىققا الدى. ءان مەن بيگە ۇلاسقان مەرەكەلىك باعدارلاما تۇرعىنداردىڭ كوڭىل كۇيىن كوتەردى.
اقمولا وبلىسى – ەلىمىزدەگى ءىرى اگرارلىق وڭىرلەردىڭ ءبىرى. ءوڭىر ەلوردانىڭ ازىق-تۇلىك بەلدەۋىن قالىپتاستىرۋدا ماڭىزدى ءرول اتقارادى. قازىر وبلىس شارۋالارى استانانىڭ ءسۇت ونىمدەرىنە دەگەن قاجەتتىلىگىنىڭ شامامەن 40 پايىزىن، ەت ونىمدەرىنىڭ 30 پايىزىن جانە اسحانالىق جۇمىرتقاعا سۇرانىسىنىڭ 80 پايىزىن قامتاماسىز ەتەدى. بۇل – تاۋلىگىنە 140 توننا ءسۇت، 80 توننا ەت جانە 700 مىڭ دانا جۇمىرتقا.
اۋىل شارۋاشىلىعى ونىمدەرىن ءوندىرۋ كولەمى دە ارتىپ كەلەدى. جىل باسىنان بەرى وڭىردە ازىق-تۇلىك ءوندىرىسى 14,8 پايىزعا ءوسىپ، 251 ميلليارد تەڭگەگە جەتكەن. اتاپ ايتقاندا، وڭدەلگەن ءسۇت ءوندىرىسى 107,7 مىڭ توننانى، ەت ءوندىرىسى 75,6 مىڭ توننانى قۇرادى. ۇن ءوندىرۋ كولەمى 50,9 پايىزعا ءوسىپ، 219,1 مىڭ تونناعا جەتتى. ال وسىمدىك مايى ءوندىرىسى 60,1 مىڭ توننانى قۇرادى.
مال شارۋاشىلىعىندا دا وندىرىستىك قۋاتتى ارتتىرۋ جۇمىستارى جالعاسىپ جاتىر. سوڭعى ءۇش جىلدا وبلىستا جالپى قۋاتى 5,8 مىڭ باسقا ارنالعان التى ءسۇت-تاۋار فەرماسى ىسكە قوسىلعان. الداعى جىلدارى تاعى التى فەرمانىڭ قۇرىلىسىن اياقتاۋ جوسپارلانعان. قۇس فابريكالارىنىڭ قۋاتىن كەڭەيتۋ ارقىلى جۇمىرتقا ءوندىرىسىن جىلىنا شامامەن 1 ميلليارد داناعا جەتكىزۋ كوزدەلىپ وتىر.
بۇدان بولەك، وڭىردە ەت كلاستەرىن قۇرۋ، استىق پەن مايلى داقىلداردى تەرەڭ وڭدەيتىن كاسىپورىندار سالۋ جوبالارى جۇزەگە اسىرىلۋدا. ماسەلەن، ارشالى اۋدانىندا جىلىنا 3 ميلليون تونناعا دەيىن استىق وڭدەۋگە قاۋقارلى كاسىپورىن سالۋ جوسپارلانعان. مۇنداي جوبالار اۋىل شارۋاشىلىعى ونىمدەرىنىڭ قوسىلعان قۇنىن ارتتىرىپ، ءوڭىردىڭ وندىرىستىك الەۋەتىن نىعايتۋعا باعىتتالعان.
وسىلايشا، اقمولا وبلىسى ەلوردانى ازىق-تۇلىكپەن قامتاماسىز ەتۋ كولەمىن ارتتىرۋدى كوزدەپ وتىر. ال استاناداعى جارمەڭكە – جەرگىلىكتى وندىرۋشىلەردىڭ ءونىمىن تۇتىنۋشىعا تىكەلەي ۇسىنىپ، تۇرعىندارعا ساپالى ءارى قولجەتىمدى ازىق-تۇلىك ساتىپ الۋعا مۇمكىندىك بەرەتىن الاڭ.
