كوكشەتاۋدا رەسپۋبليكا كۇنىنە ارنالعان سالتاناتتى جيىندا ءوڭىردىڭ الەۋمەتتىك-ەكونوميكالىق دامۋىنا جانە ءتۇرلى سالالاردىڭ وركەندەۋىنە ۇلەس قوسقان ازاماتتارعا مەملەكەتتىك ناگرادالار تابىستالدى. ءىس-شارا بارىسىندا بىرقاتار ازامات «اقمولا وبلىسىنىڭ قۇرمەتتى ازاماتى» اتاعىنا يە بولدى.
مەرەكەلىك كوڭىل كۇي ءوڭىردىڭ قول جەتكىزگەن ەلەۋلى جەتىستىكتەرىمەن دە ايشىقتالدى. وبلىس اكىمى مارات احمەتجانوۆ قۇتتىقتاۋ سوزىندە ايماقتىڭ دامۋ كورسەتكىشتەرىنە توقتالدى. اقمولا وبلىسى ەلىمىزدىڭ جەتەكشى اگرارلىق-يندۋستريالىق ورتالىقتارىنىڭ ءبىرى رەتىندەگى ورنىن نىعايتىپ كەلەدى. سوڭعى ءۇش جىلدا وڭىرگە 2,2 تريلليون تەڭگە ينۆەستيتسيا تارتىلىپ، ونىڭ 1,5 تريلليون تەڭگەسى جەكە ينۆەستيتسيالارعا تيەسىلى بولدى.
اۋىل شارۋاشىلىعى ماۋسىمىنداعى اۋا رايىنىڭ قۇبىلمالىلىعىنا قاراماستان، جەرگىلىكتى ديقاندار 6,1 ميلليون توننا استىق جينادى. ونىڭ شامامەن 90 پايىزى ءۇشىنشى سىنىپقا جاتادى، ال 70 پايىزى ىشكى جانە الەمدىك نارىقتا جوعارى سۇرانىسقا يە Hi-Pro جوعارى اقۋىزدى ساناتىنا سايكەس كەلەدى. وبلىس اكىمى ءوڭىر ەكونوميكاسىن ءارتاراپتاندىرۋ باعىتىندا اتقارىلىپ جاتقان جۇمىستاردى دا اتاپ ءوتتى. مايلى داقىلدار ەگىلەتىن القاپتار ءتورت ەسەدەن استام ۇلعايىپ، 838 مىڭ گەكتارعا جەتتى. جاڭا ءسۇت-تاۋار فەرمالارى اشىلىپ، زاماناۋي كاسىپورىندار ىسكە قوسىلۋدا. تاۋ-كەن ءوندىرۋ جانە مەتاللۋرگيا سالالارىندا دا جاڭا ءوندىرىس ورىندارى دامىپ كەلەدى.
اقمولالىقتاردىڭ كۇندەلىكتى ومىرىندەگى وڭ وزگەرىستەر دە ايقىن بايقالادى. وبلىستا گازداندىرۋ جۇمىستارى قارقىندى جۇرگىزىلىپ، كوگىلدىر وتىن 28 ەلدى مەكەنگە جەتكىزىلدى. سونىڭ ناتيجەسىندە 220 مىڭنان استام تۇرعىندى گازبەن قامتۋعا مۇمكىندىك تۋدى. الداعى جىلدارى «سولتۇستىك تارماق» ارقىلى جۇزدەگەن اۋىل مەن قالاعا گاز جەتكىزۋ جوسپارلانىپ وتىر.
سونىمەن قاتار وڭىردە 16 تەمىرجول ۆوكزالى جاڭعىرتىلىپ، بۇل كورسەتكىش رەسپۋبليكا بويىنشا رەكوردتىق ناتيجەگە اينالدى. تۇراقتى اۋە رەيستەرىن دامىتۋ ماقساتىندا كوكشەتاۋ اۋەجايى وبلىستىڭ مەنشىگىنە بەرىلدى. ايماقتا توزىعى جەتكەن عيماراتتاردىڭ ورنىنا زاماناۋي تۇرعىن ءۇي كەشەندەرىن سالۋعا مۇمكىندىك بەرەتىن رەنوۆاتسيا باعدارلاماسى دا جۇزەگە اسىرىلىپ جاتىر. جاڭا اۋرۋحانالار، زاماناۋي ۇلگىدەگى مەكتەپتەر مەن سپورت كەشەندەرى سالىنۋدا. ءوڭىر سپورتشىلارى حالىقارالىق جارىستاردا قازاقستاننىڭ ابىرويىن اسقاقتاتىپ كەلەدى.
وبلىس اكىمى اتاپ وتكەندەي، اقمولا وبلىسى مەن تۇتاس ەلىمىزدىڭ جەتىستىكتەرىن ءبىر عانا سوزگە سىيعىزۋ مۇمكىن ەمەس.
«قازاقستان 35 جىل ىشىندە ەكونوميكانى نىعايتۋ، وڭىرلەردى دامىتۋ جانە ازاماتتاردىڭ ءومىر ءسۇرۋ ساپاسىن ارتتىرۋ باعىتىندا ەلەۋلى ناتيجەلەرگە قول جەتكىزدى. جالپىۇلتتىق ماقساتتاردى جۇزەگە اسىرۋعا اقمولا وبلىسى دا ءوز ۇلەسىن قوسىپ كەلەدى. ءوڭىر ەلىمىزدىڭ جەتەكشى اگرارلىق-يندۋستريالىق ورتالىقتارىنىڭ ءبىرى رەتىندەگى ۇستانىمىن دايەكتى تۇردە نىعايتىپ وتىر»، – دەدى مارات احمەتجانوۆ.
سالتاناتتى جيىننىڭ شارىقتاۋ ءساتى ءوڭىردىڭ ۇزدىك ازاماتتارىن ماراپاتتاۋ ءراسىمى بولدى. مەملەكەتتىك ناگرادالارعا اقمولانىڭ 50 ازاماتى يە بولىپ، ءوڭىردىڭ بىرقاتار كورنەكتى وكىلىنە «اقمولا وبلىسىنىڭ قۇرمەتتى ازاماتى» اتاعى بەرىلدى. جينالعاندار الدىندا ءسوز سويلەگەن وبلىس اكىمى مارات احمەتجانوۆ ءاربىر جەتىستىكتىڭ ارتىندا ءوڭىر تۇرعىندارىنىڭ كۇندەلىكتى ادال ەڭبەگى مەن جاسامپازدىققا ۇمتىلىسى تۇرعانىن اتاپ ءوتتى.
اتالعان اتاققا يە بولعان اقان سەرى اتىنداعى جوعارى مادەنيەت كوللەدجىنىڭ وقىتۋشىسى قۇرالاي ىدىرىسوۆا بۇل ماراپات – كوپ جىلعى ەڭبەگىنە بەرىلگەن جوعارى باعا ەكەنىن اتاپ ءوتتى. ول مەرەكەگە وراي جەرلەستەرىن قۇتتىقتاپ، وڭىردە جۇزەگە اسىرىلىپ جاتقان وزگەرىستەرگە توقتالدى.
«بۇگىن بارشا قازاقستاندىقتاردى، جەرلەستەرىمدى، كوكشەتاۋلىقتاردى جانە اقمولا وبلىسىنىڭ تۇرعىندارىن ۇلتتىق مەرەكە – رەسپۋبليكا كۇنىمەن شىن جۇرەكتەن قۇتتىقتاعىم كەلەدى! قالامىزدى قازىر تانۋ قيىن: ول ۇنەمى وزگەرىپ كەلەدى. جاڭا نىساندار سالىنىپ، اباتتاندىرۋ جۇمىستارى جۇرگىزىلىپ جاتىر. كوكشەتاۋدىڭ دامىپ كەلە جاتقانىنا، مادەنيەت پەن سپورتقا كوڭىل ءبولىنىپ جاتقانىنا قۋانامىن »، – دەدى ول.
سالتاناتتى جيىندا اۋىل شارۋاشىلىعى سالاسىنىڭ وكىلى، «زاپوروجە اگرو» جشس-ءنىڭ جاقسى اۋدانىنداعى باس اگرونومى سۆەتلانا پەترەنكو دا ماراپاتتالدى. ول شيرەك عاسىردان بەرى تۋعان جەرىندە ەڭبەك ەتىپ كەلەدى. ماماندىعىن تاڭداۋعا اكەسىنىڭ ىقپالى بولعانىن ايتقان ول بۇگىندە وتباسىلىق ەڭبەك ءداستۇرىن جالعاستىرىپ ءجۇر.
«جەرگە دەگەن سۇيىسپەنشىلىكتى ماعان اكەم دارىتتى. ول دا باس اگرونوم بولعان، مەن اكەمنىڭ جولىن جالعاستىرىپ كەلەمىن. جەردە ەڭبەك ەتىپ جۇرگەنىمە 25 جىل بولدى. وسىنداي ۇلى مەملەكەتتىك مەرەكە قارساڭىندا كوپ جىلعى ەڭبەگىمنىڭ باعالانۋى مەن ءۇشىن وتە قۋانىشتى. ەڭبەگىمە جوعارى باعا بەرىپ، مەملەكەتتىك ناگرادامەن ماراپاتتاعانى ءۇشىن قازاقستان پرەزيدەنتىنە العىسىمدى بىلدىرەمىن»، – دەدى سۆەتلانا پەترەنكو.
مەرەكەلىك جيىن وبلىستىڭ ۇزدىك ارتىستەرى مەن شىعارماشىلىق ۇجىمدارى ونەر كورسەتكەن ۇلكەن كونتسەرتتىك باعدارلامامەن اياقتالدى. ونەرپازدار كورەرمەندەرگە جارقىن مۋزىكالىق نومىرلەر ۇسىنىپ، مەرەكەلىك كوڭىل كۇي سىيلادى.
