ع.قۇرمانعاليەۆ اتىنداعى وبلىستىق اكادەميالىق فيلارمونيانىڭ كامەرالىق زالىندا اۆتوجول سالاسى جانە اۆتوموبيل كولىگى قىزمەتكەرلەرىنىڭ كۇنىنە ارنالعان سالتاناتتى جيىن مەن كونتسەرت ءوتتى. وعان ايماق باسشىسى ناريمان تورەعاليەۆ قاتىسىپ، اۆتوجولشىلاردى كاسىبي مەرەكەمەن قۇتتىقتادى.
وبلىس اكىمى مەملەكەت باسشىسى قاسىم-جومارت توقاەۆتىڭ بۇگىنگى «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا كولىك ينفراقۇرىلىمىن دامىتۋعا ەرەكشە نازار اۋدارعانىن اتاپ ءوتتى.
– پرەزيدەنتىمىز جولداۋدا: ء«بىز قازاقستاننىڭ بارلىق ايماعىن بايلانىستىراتىن، ياعني، ەلىمىزدىڭ ترانزيتتىك الەۋەتىن كۇشەيتەتىن زاماناۋي، وتە دامىعان تەمىرجول جانە كولىك جولدارىنىڭ تۇتاس جەلىسىن قۇرۋىمىز كەرەك. بۇل – ستراتەگيالىق مىندەت»، – دەپ اتاپ كورسەتتى. بۇل مىندەتتى جۇزەگە اسىرۋدا جولشىلار مەن كولىك سالاسى قىزمەتكەرلەرىنە ۇلكەن جاۋاپكەرشىلىك جۇكتەلەدى. سىزدەردىڭ كۇندەلىكتى ەڭبەكتەرىڭىز وڭىرلەر اراسىنداعى بايلانىستى نىعايتىپ، ەل ەكونوميكاسىنىڭ دامۋىنا تىكەلەي ىقپال ەتەدى، – دەدى ناريمان تورەعاليەۆ.
وڭىردە جول ينفراقۇرىلىمىن دامىتۋ باعىتىندا اۋقىمدى جۇمىستار اتقارىلۋدا. 2023–2026 جىلدارى جالپى قۇنى 258 ملرد تەڭگەگە 1,5 مىڭ شاقىرىمنان استام اۆتوموبيل جولىن سالۋ، قايتا جاڭعىرتۋ جانە جوندەۋ جۇمىستارى قامتىلدى.
قازىرگى تاڭدا وبلىستاعى اۆتوموبيل جولدارىنىڭ جالپى ۇزىندىعى 6 مىڭ شاقىرىمنان اسادى. ونىڭ 1 349 شاقىرىمى – رەسپۋبليكالىق، 4 714 شاقىرىمى – جەرگىلىكتى ماڭىزى بار جولدار. رەسپۋبليكالىق جولداردىڭ 98 پايىزى، جەرگىلىكتى جولداردىڭ 60 پايىزى نورماتيۆتىك تالاپتارعا سايكەس كەلەدى.
سالتاناتتى جيىندا اۆتوجول جانە اۆتوموبيل كولىگى سالاسىنىڭ دامۋىنا ۇلەس قوسقان قىزمەتكەرلەر مەن ارداگەرلەرگە قازاقستان رەسپۋبليكاسى كولىك مينيسترلىگىنىڭ سالالىق ماراپاتتارى، قۇرمەت گراموتالارى مەن العىس حاتتارى تابىستالدى.
