قازاقستان مۇسىلماندارى ءدىني باسقارماسى مارقۇمداردىڭ بەينەسىن جي ارقىلى جانداندىرۋعا قاتىستى پىكىر ءبىلدىردى, دەپ حابارلايدى «ادىرنا» ءتىلشىسى.
قمدب تۇسىندىرۋىنشە، بۇل جاعدايعا بىرجاقتى باعا بەرۋگە بولمايدى.
«يسلام فيقھ نەگىزدەرى قاعيداسى بويىنشا: ء"بىر نارسەگە بەرىلەتىن ۇكىم ونى دۇرىس ءتۇسىنىپ، ءمانىن انىقتاۋعا بايلانىستى" دەپ بەلگىلەنگەن. سوندىقتان قايتىس بولعان ادامداردىڭ سۋرەتتەرىن جاساندى ينتەللەكت ارقىلى قوزعالىسقا كەلتىرۋدىڭ ۇكىمى ونى قولدانۋ ماقساتى مەن ناقتى جاعدايىنا قاراي ءارتۇرلى بولادى»،– دەلىنگەن حابارلامادا.
دەگەنمەن، باسقارما جاساندى ينتەللەكتتى قولدانۋدىڭ شەكتەۋلەرى دە بار ەكەنىن مالىمدەدى. اتاپ ايتقاندا، مارقۇمنىڭ بەينەسىن جانداندىرۋ ادامنىڭ شىنايى ومىردەن الشاقتاۋىنا، وتكەنگە بايلانىپ قالۋىنا، قايعىسىنىڭ قايتا كۇشەيۋىنە نەمەسە اللانىڭ ولىمگە قاتىستى بەلگىلەگەن تاعدىرىنا قارسىلىق تانىتۋىنا سەبەپ بولسا، مۇنداي ارەكەتكە جول بەرىلمەيدى. ايتۋلارىنشا، بۇل ادامنىڭ وزىنە دە، جاقىندارىنا دا رۋحاني جانە پسيحولوگيالىق تۇرعىدان زيان كەلتىرۋى ىقتيمال.
سونداي-اق مارقۇمنىڭ كوزى تىرىسىندە ايتپاعان سوزدەرىن ونىڭ اتىنان سويلەتىپ، جالعان اقپارات تاراتۋعا قاتاڭ تىيىم سالىناتىنى ايتىلدى.
بۇدان بولەك، ءمۇفتيات مارقۇمداردىڭ جاساندى ينتەللەكت ارقىلى وزگەرتىلگەن بەينەسىن كوممەرتسيالىق جارنامادا پايدالانۋدى دا قۇپتامايتىنىن جەتكىزدى. ويتكەنى مۇنداي ارەكەت تۇتىنۋشىلاردى جاڭىلىستىرىپ، تاۋاردى شىنايى ەمەس جولمەن ناسيحاتتاۋعا جانە ادامداردىڭ مۇلكىن ادىلەتسىز يەمدەنۋگە اكەلۋى مۇمكىن.
