رەسپۋبليكا كۇنى قارساڭىندا تاسقالا اۋدانىندا جالعىز ءۇيى اپاتتى دەپ تانىلعان 26 وتباسى باسپانالى بولدى. پاتەر كىلتتەرىن تابىستاۋ راسىمىنە وبلىس اكىمىنىڭ ورىنباسارى ميراس مۇلكاي، اۋدان باسشىلىعى مەن تۇرعىندار قاتىستى.
بيىل جالعىز ءۇيى اپاتتى دەپ تانىلعان ازاماتتاردى باسپانامەن قامتۋ تەتىكتەرى زاڭنامالىق تۇرعىدا رەتتەلىپ، «رەنوۆاتسيا» باعدارلاماسىنا ءتيىستى تولىقتىرۋلار ەنگىزىلدى. تاسقالا اۋدانىندا وسى سانات بويىنشا 33 تۇرعىن كەزەكتە تۇر. بۇگىن ولاردىڭ 79 پايىزى كوپقاباتتى ۇيدەگى جاڭا پاتەرلەرگە ورنالاستى. تۇرعىن ءۇي اۋلاسى اباتتاندىرىلعان. بالالار ويىن الاڭى جاساقتالىپ، كوگالداندىرۋ شارالارى جۇرگىزىلگەن.
ايماق باسشىسىنىڭ ورىنباسارى جاڭا قونىس يەلەرىنە وبلىس اكىمى ناريمان تورەعاليەۆتىڭ مەرەكەلىك قۇتتىقتاۋىن جەتكىزدى. ميراس مۇلكاي حالىقتى باسپانامەن قامتۋ مەملەكەت ساياساتىنىڭ باسىم باعىتى ەكەنىن اتاپ ءوتتى.
- مەملەكەت باسشىسى قاسىم-جومارت كەمەلۇلى توقاەۆ حالىقتىڭ ءومىر ساپاسىن ارتتىرۋعا باعىتتالعان ناقتى مىندەتتەر جۇكتەدى. سونىڭ ءبىرى — اۋىلدىق ەلدى مەكەندەردەگى ينفراقۇرىلىمدى دامىتۋ، تۇرعىن ءۇي قۇرىلىسىن جانداندىرۋ. بيىلدان باستاپ جالعىز ءۇيى اپاتتى دەپ تانىلعان ازاماتتاردى باسپانامەن قامتۋعا ەرەكشە نازار اۋدارىلدى. وسى ساناتتاعى وتباسىلارعا ورال قالاسىن ايتپاعاندا، جاڭاقالا، سىرىم اۋداندارىندا جاڭا پاتەرلەر بەرىلدى. بۇل جۇمىس جالعاسادى. شاڭىراقتارىڭىز شاتتىققا تولىپ، باق-بەرەكەلى بولعاي!، - دەدى ميراس مۇلكاي.
اۋىل تۇرعىندارى مەملەكەت قولداۋى ءۇشىن زور ريزاشىلىعىن ءبىلدىرىپ، قۇرىلىستىڭ باسى-قاسىندا بولعان ازاماتتارعا العىس ايتتى.
ايتا كەتەيىك، 2023 جىلدان بەرى وڭىردە 7 مىڭنان استام پاتەر پايدالانۋعا بەرىلدى. ونىڭ 40 پايىزى اۋىلدىق ەلدى مەكەندەردە بوي كوتەردى.
