"ارالدىڭ كەبىن كيمەسە ەكەن": كاسپي تەڭىزى تارتىلىپ بارادى

3223
Adyrna.kz Telegram
بايلىعى مەن يگىلىگىن بەس مەملەكەت قاتار كورىپ وتىرعان كاسپي تەڭىزى سوڭعى 15 جىلدا 2 مەترگە تارتىلعان. حازار تەڭىزىنىڭ دەڭگەيى تۇسكەننىڭ ۇستىنە ءتۇسىپ بارادى دەيدى ماماندار. ونىڭ ۇستىنە، كاسپي تەڭىزىنىڭ فلوراسى مەن فاۋناسى دا زارداپ شەگىپ وتىر. بۇعان پرەزيدەنتتىڭ ءوزى الاڭداۋشىلىق تانىتىپ، تەڭىزدىڭ پروبلەمالارى بويىنشا عىلىمي-زەرتتەۋ ينستيتۋتىن قۇرۋدى تاپسىردى، دەپ حابارلايدى "ادىرنا" ۇلتتىق پورتالى.

بۇل ماسەلەگە قاتىستى مامان پىكىر ءبىلدىردى. ولگا باچكوۆا مەتەوستانتسيادا 40 جىلدان بەرى جۇمىس ىستەيدى.  ونىڭ ايتۋىنشا، وسى كەزگە دەيىن سۋ دەڭگەيىن ولشەيتىن باعانا 4 رەت تومەن ءتۇسىرىلدى. سەبەبى، تەڭىز تارتىلعان سايىن باعاناداعى ولشەم بىرلىكتەرى جەر ۇستىندە قالىپ وتىر، دەپ جازادى qazaqstan.tv.

تەڭىز دەڭگەيى 80-ءشى جىلدارى جاقسى كوتەرىلگەن، دەيدى. بىراق سودان كەيىن تەك تارتىلۋ ۇستىندە.

- ءبىز تەك احۋالدى باقىلاپ وتىرامىز. ءار ولشەگەن سايىن تومەندەگەنىن بايقايمىز. بۇل ماسەلەگە عالىمدار كىرىسۋ كەرەك. تەك ماڭعىستاۋداعى ەمەس، كاسپيدىڭ جاعاسىنداعى بارلىق مەتەوستانتسيالارداعى كوپ جىلدىق مالىمەتتەردى سالىستىرىپ، ناقتى سەبەبىن انىقتاۋ قاجەت دەپ ويلايمىن، - دەدى مەتەوستانتسيا قىزمەتكەرى ولگا باچكوۆا.

قازىرگى ۋاقىتتا كاسپي تەڭىزىنىڭ جاعالاۋىن قاتار جايلاعان مەملەكەت ماماندارى توقاەۆتىڭ مۇرىندىق بولۋىمەن «كاسپي تەڭىزىن زەرتتەۋ ينستيتۋتىن» قۇرعالى جاتىر. ورتالىقتى كەلەسى جىلى اشۋ جوسپارلانعان.

"جاھاندىق جىلىنۋ سالدارىنان تەڭىز سۋى قارقىندى بۋلانعان. ونىڭ ۇستىنە، جاۋىن-شاشىن مولشەرى وتە از. سوڭعى كەزدەردە كاسپيگە قۇياتىن ەدىل مەن جايىق وزەندەرىندەگى سۋ دەڭگەيى دە ماردىمدى ەمەس. تەڭىزدەگى سۋ دەڭگەيىنىڭ تومەندەۋىنە اسەر ەتىپ جاتقان فاكتورلار وسىنداي", - دەيدى ماماندار. قالعان سەبەپتەر عىلىمي نەگىزدە الداعى ۋاقىتتا سارالانباق.

"ادىرنا" ۇلتتىق پورتالى

پىكىرلەر