فوتو: ۆيدەودان الىندى
ماڭعىستاۋ وبلىسىندا ۆاحتالىق اۆتوبۋس جاياۋ جۇرگىنشىنى قاعىپ كەتتى. جول اپاتى سالدارىنان مۇناي كومپانياسىنىڭ قىزمەتكەرى وقيعا ورنىندا كوز جۇمدى. اقپاراتتى وبلىستىق پوليتسيا دەپارتامەنتى راستادى، دەپ حابارلايدى “ادىرنا”.
قايعىلى جاعداي 6 قاراشا كۇنى ساعات 11:30 شاماسىندا اقتاۋ–قالامقاس تاسجولىنىڭ 170–171-شاقىرىمىندا بولعان. قاراجانباس كەن ورنىنا قاراي باعىت العان Daewoo ماركالى ۆاحتالىق اۆتوبۋس جولدان ءوتىپ بارا جاتقان «ماڭعىستاۋمۇنايگاز» كومپانياسىنىڭ قىزمەتكەرىن قاعىپ كەتكەن.
وبلىستىق پوليتسيا دەپارتامەنتىنىڭ مالىمەتىنشە، اتالعان دەرەك بويىنشا قىلمىستىق ءىس قوزعالعان. كولىك ارنايى تۇراققا قويىلعان.
قازىر پوليتسيا قىزمەتكەرلەرى جول اپاتىنىڭ سەبەپتەرى مەن ءمان-جايىن انىقتاپ جاتىر.
«ماڭعىستاۋمۇنايگاز» كومپانياسى دا قىزمەتكەرىنىڭ قازا تاپقانىن راستادى. كومپانيا مارقۇمنىڭ تۋعان-تۋىستارى مەن جاقىندارىنا كوڭىل ايتتى.
