قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى ەرلان قارين جاڭا قوعامدىق ەتيكانى قالىپتاستىرۋدىڭ ماڭىزى تۋرالى پىكىر ءبىلدىردى، دەپ حابارلايدى “ادىرنا”.
ونىڭ ايتۋىنشا، ءوزىن-ءوزى ۇستاۋ مادەنيەتىن، جاڭا قوعامدىق ەتيكا قاعيداتتارىن ورنىقتىرۋ – ۇلتتىڭ دامۋى مەن وركەندەۋىنىڭ نەگىزگى العىشارتتارىنىڭ ءبىرى. بۇل باعىتقا مەملەكەت باسشىسى قاسىم-جومارت توقاەۆ ەرەكشە ءمان بەرىپ كەلەدى.
ەرلان قارين قازىرگى قوعامداعى كوپتەگەن داۋ-داماي مەن كيكىلجىڭ ازاماتتاردىڭ قاراپايىم ادەپ نورمالارىن ساقتاماۋى، ءوزارا قۇرمەتتىڭ تومەندەۋى سالدارىنان تۋىندايتىنىن اتاپ ءوتتى. ونىڭ پىكىرىنشە، مۇنداي ماسەلەلەردىڭ الدىن الۋدىڭ باستى جولى – ءار ادامنىڭ جەكە مادەنيەتىن قالىپتاستىرۋ.
سونداي-اق ول ۇلت ساپاسىن ارتتىرۋ مەن ازاماتتاردىڭ مىنەز-قۇلقىن وزگەرتۋ ۇزاقمەرزىمدى ءارى جۇيەلى جۇمىستى قاجەت ەتەتىنىن ايتتى. بۇل باعىتتا جالاڭ ۇگىت-ناسيحاتتان گورى ناقتى ىستەردىڭ ءتيىمدى ەكەنىن جەتكىزدى.
ەرلان قاريننىڭ سوزىنشە، پرەزيدەنتتىڭ تاپسىرماسىمەن ەلىمىزدە وسى باعىتتا بىرقاتار باستاما جۇزەگە اسىرىلىپ جاتىر. اتاپ ايتقاندا، مەكتەپتەردە «ادال ازامات» ءبىرتۇتاس تاربيە باعدارلاماسى ەنگىزىلدى، ۆانداليزمگە قارسى زاڭ قابىلداندى، تابيعي نىسانداردى قورعاۋ تالاپتارى كۇشەيتىلدى، قوعامدىق ورىنداردا بەتتى تۇمشالاپ جۇرۋگە قاتىستى زاڭنامالىق نورما ەنگىزىلدى. سونىمەن قاتار كوشەدە بەيادەپ ءسوز ايتۋعا تىيىم سالىنىپ، جول قوزعالىسى ەرەجەلەرىن ساقتاۋ تالاپتارى كۇشەيتىلدى.
بۇدان بولەك، الەۋمەتتىك جەلىلەردە ازاماتتاردىڭ ار-نامىسى مەن قادىر-قاسيەتىن قورلاۋ ارەكەتتەرىنە قاتىستى جاۋاپكەرشىلىك قاراستىرىلعان. ەرلان قاريننىڭ ايتۋىنشا، ىشكى ىستەر مينيسترلىگى حايپ ءۇشىن زاڭ بۇزاتىن الەۋمەتتىك جەلى قولدانۋشىلارى مەن قاۋىپتى پرانك ۇيىمداستىرۋشىلاردى جاۋاپكەرشىلىككە تارتىپ، ولاردىڭ ارەكەتتەرىن جاريا تۇردە كورسەتۋدى قولعا العان. پرەزيدەنتى اكىمشىلىگى باسشىسىنىڭ ءبىرىنشى ورىنباسارىنىڭ پىكىرىنشە، مۇنداي شارالار قوعامعا پروفيلاكتيكالىق اسەر ەتەدى.
