28 قازاندا الماتى قالاسىنىڭ الاتاۋ اۋدانىندا كورنەكتى عالىم، ابايتانۋشى قايىم مۇحامەدحانوۆتىڭ ەسىمى بەرىلگەن كوشەنىڭ سالتاناتتى اشىلۋى ءوتتى. ءىس-شارا عالىمنىڭ تۋعانىنا 110 جىل تولۋى جانە قازاقستان تاۋەلسىزدىگىنىڭ 35 جىلدىعى قارساڭىندا ۇيىمداستىرىلعان. بۇل تۋرالى عالىمنىڭ قىزى، پروفەسسور دينا مۇحامەدحان ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، كوشەنىڭ اشىلۋى – تاريحي ادىلەتتىلىكتى قالپىنا كەلتىرۋدىڭ، ۇلتتىق قۇندىلىقتارعا قۇرمەت كورسەتۋدىڭ جانە ۇرپاقتار ساباقتاستىعىن نىعايتۋدىڭ كورىنىسى.
كوشەنىڭ اشىلۋ سالتاناتىنان كەيىن Alatau Creative Hub ورتالىعىندا «قايىم مۇحامەدحانوۆ – ۇلت رۋحانياتىنىڭ شامشىراعى» اتتى ادەبي-تانىمدىق، مۋزىكالىق-پوەزيالىق كەش وتكەن. ءىس-شارانى الماتى قالاسى كىتاپحانالار بىرلەستىگى، جازۋشىلار كىتاپحاناسى جانە ا. پ. چەحوۆ اتىنداعى كىتاپحانا ۇيىمداستىرعان.
كەش بارىسىندا «الاتاۋ» تەاترىنىڭ ارتىستەرى، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى، مەكتەپ وقۋشىلارى، اقىندار مەن انشىلەر ونەر كورسەتكەن. قاتىسۋشىلار عالىمعا ارنالعان ولەڭدەر وقىپ، اندەر ورىنداعان.
دينا قايىمقىزىنىڭ مالىمەتىنشە، وتباسى عالىمنىڭ ءارحيۆىن ساقتاپ، ونىڭ عىلىمي جانە مادەني مۇراسىن كوپشىلىككە جەتكىزۋ جۇمىسىن جالعاستىرىپ كەلەدى. ارحيۆ ماتەريالدارى نەگىزىندە وسى ۋاقىتقا دەيىن 30-دان استام كىتاپ جارىق كورگەن. سالتاناتتى كەش اياسىندا Alatau Creative Hub كىتاپحاناسىنا دا كىتاپتار سىيعا تارتىلدى.
