الەۋمەتتىك جەلىلەر مەن ءتۇرلى توپتاردا وسى كۇندەرى دالادا نەمەسە باسقا دا كوپشىلىك جينالاتىن ورىنداردا جۇرگەن بالالاردىڭ اتا-انالارى جاۋاپكەرشىلىككە تارتىلاتىنى تۋرالى حابارلاما تاراتىلىپ جاتىر. قالالىق ءبىلىم باسقارماسى بۇل اقپاراتقا قاتىستى تۇسىنىكتەمە بەردى، دەپ حابارلايدى ەلوردا ينفو.
«قاۋىپسىزدىك شارالارىنا بايلانىستى ەرتەڭنەن باستاپ مەكتەپتەردە ءتۇرلى شارالار وتكىزىلەدى. ەگەر وسى ۋاقىت ارالىعىندا وقۋشى قوسىمشا ساباقتار مەن ۇيىرمەلەرگە قاتىسۋ ءۇشىن مەكتەپكە كەلسە ءبىلىم ورداسىنىڭ باسشىلىعى جاۋاپكەرشىلىككە تارتىلادى. ەگەر بالالار دۇكەندە، اۆتوبۋستاردا نەمەسە دالادا جۇرسە ونىڭ اتا-اناسىنا ايىپپۇل سالىنادى! بۇل حابارلامانى اتا-انالار چاتىنا جەدەل تۇردە تاراتىڭىزدار»، دەلىنگەن اقپارات تاراپ جاتىر.
نۇر-سۇلتان قالاسىنىڭ ءبىلىم باسقارماسى بۇل حابار شىندىققا جاناسپايتىنىن جانە قاجەتتى اقپاراتتار مەملەكەتتىك ورگاننىڭ رەسمي پاراقشالارىندا جاريالاناتىنىن ايتتى.
