الماتى وبلىسىندا سوڭعى ءۇش جىلدا 50-گە جۋىق اۋىلدىڭ كوشەلەرىنە العاش رەت اسفالت توسەلدى. جاڭارعان كوشەلەردىڭ جالپى ۇزىندىعى 66,5 شاقىرىمدى قۇرايدى. بۇل جۇمىستارعا جەرگىلىكتى بيۋدجەتتەن 1,64 ملرد تەڭگەگە جۋىق قارجى ءبولىندى، دەپ حابارلايدى الماتى وبلىسى اكىمىنىڭ ءباسپاسوز قىزمەتى.
جاڭا جولدار ەڭبەكشىقازاق اۋدانىنداعى سايماساي، اقتوعان، امانگەلدى، المالى، قورام جانە ساتاي اۋىلدارىندا، ۇيعىر اۋدانىنداعى شونجى، راحات، اقتام اۋىلدارىندا، تالعار اۋدانىنداعى بەرەكە، تۇزدىباستاۋ، توڭكەرىس، قىزىلتۋ، جاڭالىق جانە ءتۇزۋساي اۋىلدارىندا، جامبىل اۋدانىنداعى قارعالى، ۇلكەن، شيەن، بەرىكتاس، شولاققارعالى، ۇڭگىرتاس جانە ىنتىماق اۋىلدارىندا، ىلە اۋدانىنداعى بايكەنت، جاپەك باتىر، كازتسيك، اقساي، ءالي اۋىلدارىندا، سونداي-اق بالقاش، كەگەن، رايىمبەك جانە قاراساي اۋداندارىنداعى اۋىلداردىڭ بىرقاتار كوشەسىنە توسەلدى. بۇل ەلدى مەكەندەردىڭ كەيبىرىندە تۇرعىندار اسفالت جولدى 30 جىلدان استام ۋاقىت كۇتكەن. جولدىڭ جاڭارۋى اتالعان ەلدى مەكەندەردەگى 50 مىڭنان استام تۇرعىننىڭ كۇندەلىكتى قاتىناسىن جاقسارتتى.
«بيىل اۋىلىمىزعا العاش رەت اسفالت توسەلىپ، كوپتەن كۇتكەن ماسەلەمىز شەشىلدى. جاڭبىر جاۋسا، جولدىڭ جاعدايى قيىنداپ، كولىكپەن ءجۇرۋ دە، جاياۋ ءجۇرىپ-تۇرۋ دا وڭاي بولمايتىن. ەندى مىنە، كوپتەن كۇتكەن جولىمىزعا اسفالت توسەلدى. بۇل – اۋىل تۇرعىندارى ءۇشىن ۇلكەن قۋانىش. وسى ماسەلەنى شەشۋگە اتسالىسقان ازاماتتارعا العىسىمىزدى ايتامىز»، – دەدى جامبىل اۋدانى ۇڭگىرتاس اۋىلىنىڭ تۇرعىنى بەيبىت ەسىمبەكوۆ.
جول ماسەلەسى اسىرەسە حالقى كوپ ەلدى مەكەندەر ءۇشىن ماڭىزدى. ماسەلەن، ۇيعىر اۋدانىنداعى شونجى اۋىلىندا 20 مىڭنان استام تۇرعىن بار. بيىل مۇندا بۇرىن اسفالت بولماعان تاعى التى كوشەگە العاش رەت جول توسەلەدى. جالپى، وبلىستاعى ەلدى مەكەندەردىڭ باسىم بولىگىندە كوشەلەر اسفالتتالعان. دەگەنمەن، كەيبىر اۋىلداردا قيىرشىق تاس پەن شاعال توسەلگەن جولدار ءالى دە جەتكىلىكتى. ولاردى دا اسفالتتاۋ جۇمىستارى جالعاسادى.
«2026-2027 جىلدارى وبلىستا تاعى 100 شاقىرىمنان استام كوشەگە اسفالت توسەۋ جوسپارلانعان. جوسپارعا ەڭبەكشىقازاق، ۇيعىر، ىلە، جامبىل، قاراساي، كەگەن، رايىمبەك، بالقاش جانە باسقا دا اۋداندارداعى ەلدى مەكەندەردىڭ كوشەلەرى ەنگىزىلگەن. ياعني الداعى كەزەڭدە دە بۇعان دەيىن اسفالت توسەلمەگەن كوشەلەرگە جول سالۋ جالعاسىن تابادى. بۇل جۇمىستارعا قاراستىرىلعان قارجى كولەمى 4,67 ملرد تەڭگەگە جۋىق»، – دەدى الماتى وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ەرمەك بايمۇحامبەتوۆ.
جولداردىڭ جاڭارۋى اۋىل تۇرعىندارىنىڭ كۇندەلىكتى ءجۇرىپ-تۇرۋىن جەڭىلدەتتى. بۇعان دەيىن كولىك ءجۇرۋى قيىنداعان كوشەلەردە قاتىناس جاقسارىپ، مەكتەپتەرگە، مەديتسينالىق مەكەمەلەرگە جانە اۋدان ورتالىقتارىنا جەتۋ ۋاقىتى ورتا ەسەپپەن 10 - 20 مينۋتقا قىسقارعان.
