جەتىسۋ وبلىسىندا حالىقارالىق ۆولونتەرلەر جىلى اياسىندا «ZHETISU VOLUNTEER: بىرلىك. ىزگىلىك. ارەكەت.» رەسپۋبليكالىق ۆولونتەرلەر سلەتى ۇيىمداستىرىلدى. اۋقىمدى ءىس-شاراعا ەلىمىزدىڭ بارلىق وڭىرىنەن كەلگەن 70 ۆولونتەر، جاستار ۇيىمدارىنىڭ جەتەكشىلەرى، ۆولونتەرلىك قوزعالىس وكىلدەرى مەن سالا ساراپشىلارى قاتىستى. سلەتقا كەلگەن دەلەگاتتار «تازا قازاقستان» جالپىۇلتتىق باعدارلاماسى اياسىندا تالدىقورعاندا اعاش كوشەتتەرىن وتىرعىزدى، سول سياقتى تەكەلى قالاسىندا ۇزىندىعى شامامەن 38 شاقىرىم بولاتىن دىنمۇحامەد قوناەۆ اتىنداعى كوشەنىڭ بويىندا تازالىق جۇمىستارىن جۇرگىزدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
وبلىستىق ىشكى ساياسات باسقارماسى مەن «Jetisu jastary» كمم ۇيىمداستىرعان رەسپۋبليكالىق سلەتتىڭ باستى ماقساتى - ەلىمىزدەگى ۆولونتەرلىك قوزعالىستى دامىتۋ، وڭىرلەر اراسىنداعى ىنتىماقتاستىقتى نىعايتۋ، ۆولونتەرلەردىڭ ۇزدىك تاجىريبەلەرىن ورتاعا سالۋ جانە جاستاردى قوعامدىق ماڭىزى بار باستامالارعا كەڭىنەن تارتۋ بولدى.
رەسپۋبليكالىق سلەتتىڭ سالتاناتتى اشىلۋىندا «ۇلتتىق ۆولونتەرلەر جەلىسى» زاڭدى تۇلعالار بىرلەستىگىنىڭ اتقارۋشى ديرەكتورى، ۇلتتىق ۆولونتەرلەر فرونت-ءوفيسىنىڭ باسشىسى ايبەك دوسىمبەتوۆ ءسوز سويلەپ، ۆولونتەرلىك قوزعالىستىڭ قوعامداعى ماڭىزدىلىعىنا توقتالدى. ونىڭ ايتۋىنشا، سوڭعى جىلدارى مەملەكەتتىك دەڭگەيدە ۆولونتەرلىك قىزمەتكە ەرەكشە كوڭىل ءبولىنىپ، ازاماتتاردىڭ قوعامدىق ومىرگە بەلسەندى ارالاسۋىنا كەڭ مۇمكىندىكتەر جاسالۋدا.
– ەڭ الدىمەن بارشاڭىزدى وسى سالتاناتتى ءىس-شارانىڭ اشىلۋىمەن شىن جۇرەكتەن قۇتتىقتايمىن! سوڭعى جىلدارى مەملەكەت دەڭگەيىندە ۆولونتەرلىك قىزمەتكە ەرەكشە كوڭىل بولىنۋدە. 2020 جىلمەن جانە ودان كەيىنگى كەزەڭمەن سالىستىرعاندا ۆولونتەرلەر سانى ەداۋىر ارتتى. بۇل ەلگە قىزمەت ەتۋدى جۇرەك قالاۋىمەن تاڭدايتىن جاستاردىڭ قاتارى كوبەيىپ كەلە جاتقانىن كورسەتەدى. سونىمەن قاتار ۆولونتەرلىك قىزمەت العاش رەت كونستيتۋتسيامىزدا كورىنىس تاپتى. سوندىقتان ءبىز ۆولونتەرلەردى قوعامنىڭ دامۋىنا سەرپىن بەرەتىن قوزعاۋشى كۇشتەردىڭ ءبىرى دەپ سانايمىز، – دەدى ايبەك دوسىمبەتوۆ.
وسى كۇنى ەلىمىزدىڭ 20 وڭىرىنەن كەلگەن دەلەگاتتار 20 ءتۇپ اعاش كوشەتىن وتىرعىزدى. سول سياقتى باعدارلاما اياسىندا سلەتتىڭ ەكىنشى كۇنىندە قاتىسۋشىلار تەكەلى قالاسىندا ۇزىندىعى شامامەن 38 شاقىرىم بولاتىن دىنمۇحامەد قوناەۆ اتىنداعى كوشەنىڭ بويىن تازالادى.
سونىمەن قاتار سلەت اياسىندا تاجىريبە الماسۋ جانە ۆولونتەرلىك قىزمەتتىڭ وزەكتى باعىتتارىن تالقىلاۋعا ارنالعان ينتەراكتيۆتى سەسسيالار ۇيىمداستىرىلدى.
ۆولونتەرلىك سالاداعى ساراپشى، ادىسكەر ءارى ترەنەر ەلەنا امرەەۆا ۆولونتەرلىك باستامالاردى ءتيىمدى ۇيىمداستىرۋ، ەرىكتىلەرمەن جۇمىس ىستەۋ جانە قوعامدىق جوبالاردىڭ ناتيجەلىلىگىن ارتتىرۋداعى تاجىريبەلەرىمەن ءبولىستى.
جاستار اراسىندا تانىمال بلوگەر، موتيۆاتسيالىق سپيكەر الپامىس جارىلقاسىنوۆ ۆولونتەرلىك قىزمەتتىڭ ماڭىزى، جاستاردىڭ بەلسەندىلىگى جانە قوعامعا پايدالى باستامالاردى قولداۋ تۋرالى ويلارىن ورتاعا سالدى.
ينتەراكتيۆتى كەزدەسۋلەر بارىسىندا قاتىسۋشىلار ءوز وڭىرلەرىندەگى تابىستى تاجىريبەلەرىمەن ءبولىسىپ، جاڭا باستامالار مەن بىرلەسكەن جوبالاردى جۇزەگە اسىرۋ مۇمكىندىكتەرىن تالقىلادى. سلەت باعدارلاماسى اياسىندا قاتىسۋشىلارعا ارنايى سەرتيفيكاتتار تابىستالدى.
اتاپ وتسەك، جەتىسۋ وبلىسىندا ۆولونتەرلىك قوزعالىستى دامىتۋعا ەرەكشە كوڭىل بولىنەدى. بۇگىندە وڭىردە 1 100-دەن استام ۆولونتەر، 13 ۆولونتەرلىك ۇيىم جانە 18 باستاماشىل توپ قوعام ءۇشىن ماڭىزدى جوبالاردى جۇزەگە اسىرۋعا اتسالىسۋدا. ولاردىڭ قىزمەتى ەكولوگيالىق اكتسيالار ۇيىمداستىرۋدى، قارتتار مەن الەۋمەتتىك قولداۋدى قاجەت ەتەتىن ازاماتتارعا كومەك كورسەتۋدى، قايىرىمدىلىق باستامالارىن ىسكە اسىرۋدى، سالاۋاتتى ءومىر سالتىن ناسيحاتتاۋدى جانە جاستاردىڭ ازاماتتىق بەلسەندىلىگىن ارتتىرۋ باعىتتارىندا.
وڭىردەگى ۆولونتەرلىك قىزمەتتى ۇيلەستىرۋدە 2023 جىلى قۇرىلعان «مەيىرىمدى جەتىسۋ» فرونت-ءوفيسى ماڭىزدى ءرول اتقاردى.
جىل باسىنان بەرى وبلىس ۆولونتەرلەرىنىڭ قاتىسۋىمەن مادەنيەت، ءبىلىم بەرۋ، ەكولوگيا جانە دەنساۋلىق ساقتاۋ سالالارىندا 6 مىڭنان استام اكتسيا وتكىزىلدى. كوپبالالى جانە از قامتىلعان وتباسىلارعا، سونداي-اق جالعىزباستى قارتتارعا كومەك كورسەتىلدى. اتالعان ءىس-شارالارعا 50 مىڭعا جۋىق ەرىكتى قاتىستى.
ەكى كۇنگە سوزىلعان «ZHETISU VOLUNTEER: بىرلىك. ىزگىلىك. ارەكەت» رەسپۋبليكالىق ۆولونتەرلەر سلەتى ەلىمىزدىڭ ءار وڭىرىنەن كەلگەن بەلسەندى جاستاردى ورتاق ماقسات توڭىرەگىندە بىرىكتىرگەن ماڭىزدى الاڭعا اينالدى. سلەت بارىسىندا قاتىسۋشىلار جاڭا تاجىريبە جيناقتاپ، وڭىرارالىق ارىپتەستىك بايلانىستارىن نىعايتتى جانە الداعى ۋاقىتتا بىرلەسكەن الەۋمەتتىك ءارى ەكولوگيالىق جوبالاردى جۇزەگە اسىرۋعا باعىتتالعان باستامالاردى تالقىلادى.
ۆولونتەرلەردىڭ حالىقارالىق جىلى اياسىندا ۇيىمداستىرىلعان رەسپۋبليكالىق سلەت جەتىسۋ وبلىسىندا ۆولونتەرلىك قوزعالىستى ودان ءارى دامىتۋعا، جاستاردىڭ قوعامدىق ومىرگە بەلسەندى ارالاسۋىنا جانە ۆولونتەرلىك مادەنيەتتى كەڭىنەن ناسيحاتتاۋعا تىڭ سەرپىن بەردى.
