رەسپۋبليكا كۇنى قارساڭىندا جەتىسۋ وبلىسىندا 50-گە جۋىق وتباسى قونىس تويىن تويلادى. تۇرعىن ءۇي كەزەگىندە تۇرعان ازاماتتارعا تالدىقورعان قالاسىندا، كەربۇلاق جانە كوكسۋ اۋداندارىندا پاتەرلەر مەن جەكە تۇرعىن ۇيلەردىڭ كىلتتەرى تابىستالدى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
اتاپ ايتقاندا، تالدىقورعان قالاسىندا 22 وتباسى قونىس تويىن تويلاپ، «قۇلاگەر»، «شىعىس» شاعىناۋداندارىنان، «جاستار-3» تۇرعىن الابىنان جانە «بەرەكە» كوتتەدج قالاشىعىنان باسپانا الدى. جالپى، جىل باسىنان بەرى وبلىس ورتالىعىندا 639 وتباسى قولجەتىمدى باسپانامەن قامتاماسىز ەتىلسە، جىل سوڭىنا دەيىن بۇل كورسەتكىش 1500-دەن اسادى. ايتا كەتەيىك، 9 ايدا تالدىقورعان قالاسىندا 92,1 مىڭ شارشى مەتر تۇرعىن ءۇي پايدالانۋعا بەرىلدى.
– رەسپۋبليكا كۇنى قارساڭىندا وتباسىمىزدا قۋانىشتى وقيعا بولدى. ءتورت بالام بار، باسپانا كۇتكەنىمە كوپ بولدى. SMS-حابارلاما كەلگەندە العاشىندا ءتىپتى سەنبەدىم. بارشاڭىزدى قونىس تويلارىڭىزبەن قۇتتىقتايمىن، – دەپ قۋانىشىمەن ءبولىستى قالا تۇرعىنى ولگا گەنيەۆسكايا.
قونىس تويىن تويلاعانداردىڭ قاتارىندا كوكسۋ اۋدانىنىڭ تۇرعىندارى دا بار. ولارعا بالپىق بي جانە زىليحا تامشىباي اۋىلدارىندا ورنالاسقان جەكە تۇرعىن ۇيلەردىڭ كىلتتەرى تابىستالدى. جىل باسىنان بەرى كوكسۋ اۋدانىندا الەۋمەتتىك وسال توپتاعى 69 ازامات باسپانامەن قامتاماسىز ەتىلدى.
– كوكسۋ اۋدانىندا تۇرعىن ءۇي كەزەگىنە 2019 جىلى تىركەلدىم. التى بالانى تاربيەلەپ وتىرمىن. وبلىس اكىمىنىڭ قولداۋىمەن اۋدانىمىزدا زاماناۋي ۇيلەر سالىنىپ جاتىر. سول ۇيلەردىڭ ءبىرى بىزگە بەرىلدى. قۋانىشىمدى سوزبەن جەتكىزۋ قيىن. بالالار باقىتتى. ويتكەنى باسپانا – ءال-اۋقاتتىڭ باستى نەگىزى، – دەدى نارگيز قوجانازاروۆا.
– بالپىق بي اۋىلىندا تۇرامىز. بۇگىن وتباسىمىز جاڭا ءۇيدىڭ كىلتىن الدى. كوڭىلىمدى قۋانىش كەرنەپ تۇر. وسى ارمانىمىزعا جەتۋىمىزگە كومەكتەسكەن بارشا جانعا العىس ايتامىن. بارشاڭىزدى كەلە جاتقان رەسپۋبليكا كۇنىمەن قۇتتىقتايمىن، – دەدى جەرلەستەرىنە اسيا بايراموۆا.
سارىوزەك اۋىلىنىڭ تۇرعىندارى دا مەرەكە قارساڭىندا قونىس تويىن تويلادى. مۇندا اپاتتى دەپ تانىلعان تۇرعىن ۇيلەردە تۇرعان كەزەكتە تۇرعان 15 ازاماتقا جاڭادان سالىنعان 60 پاتەرلى تۇرعىن ۇيدەن پاتەر كىلتتەرى تابىستالدى. ولاردىڭ قاتارىندا مادينا دوسان دا بار.
– ءبىزدىڭ ءۇيىمىز ەكى جىل بۇرىن اپاتتى دەپ تانىلدى. كەزەككە سايكەس ءۇش بولمەلى پاتەردىڭ كىلتىن الدىم. جولداسىم ەكەۋمىز ءتورت بالانى تاربيەلەپ وتىرمىز. ءۇش قىزىمىز بەن ءبىر ۇلىمىز بار. جەكە باسپانامىزعا قول جەتكىزگەن سوڭ، بۇرىنعىدان دا باقىتتى بولا تۇستىك، – دەدى ول.
جالپى، بيىل جەتىسۋ وبلىسىندا 4 600 وتباسى باسپانامەن قامتاماسىز ەتىلەدى.
