21 ءساۋىر كۇنى جەتىسۋ وبلىسى، كوكتال اۋىلىندا جەكە ۇيگە قاراقشىلىق شابۋىل جاسادى دەگەن ايىپپەن ەكى كۇدىكتى ۇستالدى. اۋزى-باسىن تۇمشالاعان ەكى بەلگىسىز ەر ادام ۇيگە باسىپ كىرىپ، 28 جاسار كەلىنشەكتى ۇرەيلەندىرگەن. ۇرلىق-قارلىق جاساۋعا دانىككەن كۇدىكتىلەر ءۇي يەسىن بايلاپ، پىشاقپەن قورقىتقان، دەپ حابارلايدى "ادىرنا" ۇلتتىق پورتالى.
پوليتسيا قىزمەتكەرلەرىنىڭ بايانداۋىنشا، قوس كۇدىكتى ايەلدى بايلاپ، تۇنشىقتىرىپ، پىشاقپەن قورقىتىپ، قولما-قول اقشا تالاپ ەتكەن. ويلاعاندارىن ىسكە اسىرا الماعان ولار ۇيدەگى ەكى قىمبات تەلەفوندى، گاۋھار تاستارى بار زەرگەرلىك بۇيىمداردى، نوۋتبۋك، ءاميان جانە اۋلادا تۇرعان Toyota Camry كولىگىن قولدى قىلعان. جالپى كەلگەن شىعىن كولەمى - 22 ملن تەڭگە.
بولعان وقيعانىڭ اق-قاراسىن انىقتاۋعا پوليتسيا قىزمەتكەرلەرى كىرىستى. قازىر اۋماقتا قر قك 192-بابىنىڭ 4-بولىگى بويىنشا تەرگەۋ امالدارى جۇرگىزىلىپ جاتىر.
"اۋداندىق پوليتسيا قىزمەتكەرلەرى وبلىستىق كپب جانە ۇققكب جەدەل ۋاكىلدەرىنىڭ كومەگىمەن كۇدىكتىلەردى انىقتادى. ولاردىڭ ءبىرى - 23 جاستاعى جەرگىلىكتى تۇرعىن، ەكىنشىسى كوكسۋ اۋدانىنىڭ بۇرىن سوتتالعان 29 جاستاعى ەر ادامى بولىپ شىقتى. ەكەۋى دە ۇستالىپ، قاماۋعا الىندى. ۇرلانعان زاتتاردىڭ بارلىعى زاڭدى يەسىنە قايتارىلدى", - دەدى پانفيلوۆ اۋداندىق پب باستىعىنىڭ ورىنباسارى ەرنار قالتاەۆ.
"ادىرنا" ۇلتتىق پورتالى
ۇقساس جاڭالىقتار
