فوتو: دميتري ەروفەەۆ
مەملەكەت باسشىسىنىڭ تاپسىرماسىمەن جەتىسۋ وبلىسىندا 3 ەكو-ساياباق قۇرۋ جۇمىستارى باستالدى. سونىڭ ءبىرى – سارقان قالاسىنداعى «قويتاس». ءوڭىر باسشىسى بەيبىت يساباەۆ سارقان اۋدانىنا جاساعان جۇمىس ساپارى بارىسىندا ساياباقتىڭ اباتتاندىرۋ، كوركەيتۋ جۇمىستارىمەن تانىستى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
بەلگىلى بولعانداي، تابيعي لاندشافتى ساقتالعان ساياباق 2022 جىلى قۇرىلعان. وتكەن جىلى مۇندا 850 مەتر جاياۋ جۇرگىنشىلەر جولى توسەلىپ، ورىندىقتار، جارىقتاندىرۋ جۇيەلەرى، بالالار ويىن الاڭى، سۋبۇرقاق جانە قوقىس جاشىكتەرى ورناتىلدى. سونىمەن قاتار مادەني-كوپشىلىك ءىس-شارالاردى وتكىزۋگە ارنالعان 400 ورىندىق امفيتەاتر، ەكى باقىلاۋ الاڭى، 11 ءمۇسىن مەن شاعىن ساۋلەت نىساندارى، سونداي-اق زاماناۋي سانيتارلىق توراپ سالىندى. 1220 ءتۇپ اعاش كوشەتى وتىرعىزىلدى. قاۋىپسىزدىكتى قامتاماسىز ەتۋ ءۇشىن بەينەباقىلاۋ كامەرالارى ورناتىلدى.
اۋدان اكىمى عالىمجان مامانباەۆتىڭ ايتۋىنشا، بيىل ساياباق اۋماعىن 6 گەكتاردان 20 گەكتارعا دەيىن ۇلعايتۋ جوسپارلانىپ وتىر. بۇل رەتتە ءوڭىر باسشىسىنا نىساندى كەڭەيتۋ جانە ودان ءارى اباتتاندىرۋ جوباسى تانىستىرىلدى.
- قازىرگى ۋاقىتتا جوبالىق-سمەتالىق قۇجاتتاما ازىرلەنۋدە. وزەن جاعالاۋى بويىمەن قايىقپەن سەرۋەندەۋگە مۇمكىندىك بەرەتىن دەمالىس ايماعىنىڭ قۇرىلىسى جۇرگىزىلىپ جاتىر، سونداي-اق تۇرعىندارعا ارنالعان دەمالىس ورىندارى جابدىقتالۋدا. ەكو-ساياباقتا تۋ تۇعىرىن ورناتۋ، «شاحمات ارالىن» جاساۋ، ەتنواۋىل قۇرۋ، ءتورت تراسساسى بار جىل بويى جۇمىس ىستەيتىن تيۋبينگ ايماعىن، سۋبۇرقاق پەن جاساندى سىرعاناق سالۋ جوسپارلانعان. بۇدان بولەك، جاياۋ جۇرگىنشىلەر جولىن مولالى كوپىرىنە دەيىن ۇزارتۋ جانە ساياباقتىڭ قولجەتىمدىلىگىن ارتتىرۋ ءۇشىن قوسىمشا جاياۋ كوپىر سالۋ قاراستىرىلعان، - دەپ اتاپ ءوتتى ع. مامانباەۆ.
نىسان كەزەڭ-كەزەڭىمەن اباتتاندىرىلىپ، قازىردىڭ وزىندە اۋدان تۇرعىندارىنىڭ سۇيىكتى دەمالىس ورىندارىنىڭ ءبىرى بولىپ وتىر. بۇل رەتتە وبلىس اكىمى:
- بۇل - تابيعي لاندشافتى ساقتالعان ەكولوگيالىق پارك. تابيعاتتىڭ بۇل ەرەكشە سىيى اسەم ساۋلەتتىك شەشىمدەرمەن بەزەندىرىلە وتىرىپ، ءوزىنىڭ باستاپقى قالپىندا ساقتالۋى ءتيىس. سوندىقتان ءاربىر شارشى مەتر ءتيىمدى پايدالانىلۋى كەرەك، وسى ورايدا تەك اعاش، تاس، توپىراق سياقتى تابيعي ماتەريالدار قولدانىلۋى ءتيىس. سىزدەرگە ەكو-پاركتى دامىتۋدىڭ ستراتەگيالىق جوسپارىن ازىرلەپ، ۇسىنۋدى تاپسىرامىن. بارلىق جۇمىستى 2027 جىلى تولىق اياقتاۋدى جوسپارلاۋ كەرەك. جالپى العاندا، بۇل ەكو-پارك بولاشاقتا تەك جەرگىلىكتى تۇرعىنداردى عانا ەمەس، ەلىمىزدىڭ باسقا وڭىرلەرىنەن كەلەتىن قوناقتاردى دا تارتاتىن بىرەگەي دەمالىس ورنىنا اينالادى، — دەدى ب. يساباەۆ.
اتاپ وتسەك، جەتىسۋ وبلىسىندا «تازا قازاقستان» باعدارلاماسى اياسىندا جالپى اۋماعى 84 گەكتار بولاتىن ءۇش ەكو-ساياباق قۇرىلادى. ولار - تالدىقورعان قالاسىنداعى «تاسباقا»، تەكەلى قالاسىنداعى «سەركەساي» جانە سارقان قالاسىنداعى «قويتاس». اتالعان جوبالاردى ىسكە اسىرۋ تابيعي لاندشافتى ساقتاۋعا جانە حالىقتىڭ تۇرمىس ساپاسىن ارتتىرۋعا باعىتتالعان. جەتىسۋ وڭىرىنە كەلەتىن تۋريستەر ءۇشىن ەكو-ساياباقتار نەگىزگى كورنەكتى ورىنداردىڭ ءبىرى بولماق.
