پرەزيدەنت قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن حالىققا ءتۇسىندىرۋ بويىنشا رەسپۋبليكالىق ۇگىت-ناسيحات توبىنىڭ مۇشەلەرى قۇرىلتاي دەپۋتاتى ناۋرىز سايلاۋباي مەن قازاقستان حالىق كەڭەسىنىڭ مۇشەسى رۋفينا ۋسانوۆا تالدىقورعان قالاسىنداعى «قاينار اكب» جاۋاپكەرشىلىگى شەكتەۋلى سەرىكتەستىگىنىڭ ۇجىمىمەن كەزدەستى. كاسىپورىننىڭ ءماجىلىس زالىندا وتكەن ءىس-شاراعا 100 ادام قاتىستى.
كەزدەسۋ بارىسىندا قۇرىلتاي دەپۋتاتى ناۋرىز سايلاۋباي ءوندىرىس ورىندارىنىڭ جۇمىس ورىندارىن قۇرۋداعى، حالىقتى تۇراقتى تابىسپەن قامتاماسىز ەتۋدەگى جانە بيۋدجەت تۇسىمدەرىن ارتتىرۋداعى رولىنە توقتالدى. ول «قاينار-اكب» ونىمدەرىنىڭ شەتەل نارىعىنا شىعۋى وتاندىق ءوندىرىستىڭ الەۋەتىن كورسەتەتىنىن اتاپ ءوتتى.
– «قاينار-اكب» – ءوڭىرىمىزدىڭ ماقتانىشى. ءوزىمىزدىڭ تۋعان جەرىمىزدە شىعارىلعان ءونىمنىڭ شەتەلدە پايدالانىلىپ جۇرگەنى قۋانتادى. ءوندىرىس كولەمىنىڭ ارتۋى جاڭا جۇمىس ورىندارىنىڭ اشىلۋىنا، ازاماتتاردىڭ تابىسى مەن سالىق تۇسىمدەرىنىڭ كوبەيۋىنە ىقپال ەتىپ وتىر. سوندىقتان وسىنداي كاسىپورىندار دامۋىنىڭ ەل ەكونوميكاسىنداعى ماڭىزى زور، – دەدى دەپۋتات.
قر حالىق كەڭەسىنىڭ مۇشەسى رۋفينا ۋسانوۆا كاسىپورىن جۇمىسشىلارىنا قاجىرلى ەڭبەگى ءۇشىن العىس ايتتى.
– كاسىپورىندى ارالاۋ بارىسىندا وندىرىستەگى جۇمىستىڭ قانشالىقتى كۇردەلى ءارى جاۋاپتى ەكەنىن كوردىم. مۇندا ەڭبەك ەتەتىن 1200 ادامنىڭ 45 پايىزى ايەلدەر ەكەن. وسىنداي اۋىر جۇمىستى اتقارىپ جۇرگەن ايەل ازاماتتارعا ەرەكشە ريزاشىلىعىمدى بىلدىرەمىن. بارشاڭىزعا ەڭبەكتەرىڭىز ءۇشىن راقمەت، – دەدى رۋفينا ۋسانوۆا.
كەزدەسۋگە قاتىسۋشىلار وبلىستىڭ كولىك-لوگيستيكا الەۋەتىن ارتتىرۋ، تالدىقورعانداعى قالالىق ينفراقۇرىلىمدى دامىتۋ ماسەلەلەرىن تالقىلادى. سول سياقتى الەۋمەتتىك ينفراقۇرىلىمدى دامىتۋ مىندەتتەرىنە توقتالىپ، جول، سۋ، گاز جانە ەلەكترمەن جابدىقتاۋ ماسەلەلەرىن شەشۋدىڭ ماڭىزىن ايتتى. سونداي-اق باسقوسۋدا كاسىپورىن قىزمەتكەرلەرىنىڭ تۇرعىن ءۇي ماسەلەسى دە كوتەرىلدى. ۇجىم وكىلى جۇمىسشىلاردىڭ تابىسى كەيبىر تۇرعىن ءۇي باعدارلامالارىنىڭ تالاپتارىنا سايكەس كەلمەيتىنىن ايتىپ، ولارعا باسپانا الۋدىڭ قانداي مۇمكىندىكتەرى بارىن سۇرادى.
ناۋرىز سايلاۋباي كاسىپورىنعا «وتباسى بانكپەن» بىرلەسىپ، قىزمەتكەرلەردىڭ تابىسى مەن ەڭبەك ءوتىلىن ەسكەرەتىن ارنايى يپوتەكالىق باعدارلاما ازىرلەۋ مۇمكىندىگىن قاراستىرۋدى ۇسىندى. ول مىسال رەتىندە حرومتاۋداعى تاۋ-كەن كاسىپورنىنىڭ بانكپەن بىرلەسىپ، جۇمىسشىلارىنا باسپانا الۋعا قولداۋ كورسەتكەن تاجىريبەسىن كەلتىردى.
كەزدەسۋ سوڭىندا ناۋرىز سايلاۋباي مەن رۋفينا ۋسانوۆا قاتىسۋشىلاردىڭ سۇراقتارىنا جاۋاپ بەردى.
